Garagune lehen lerroan jarriko dute karmenek
Garaguneko kideekin hasiko dira aurtengo karmenak, haiek botako baitute txupinazoa. Garagune aniztasun funtzionala duten herritarrei begirako eguneko arreta zerbitzu zentro bat da.
Garagune aniztasun funtzionala duten herritarrei begirako eguneko arreta zerbitzu zentro bat da. Trintxerpeko Arrandegi kalean egiten ari da bidea 2020tik, eta une honetan, hamahiru pertsonari ematen diete aterpe egunero. Gipuzkoan hamazazpi Garagune zentro daude, eta horietako bat da Trintxerpekoa. Itunpeko zentroak dira, eta Goyeneche Fundazioak kudeatzen ditu. Amaia Docampo da Trintxerpeko gunearen arduraduna.
Parte hartzeko bi baldintza bete behar dira derrigorrez: 18 urte baino gehiago izatea eta aniztasun funtzionala izatea. Trintxerpen «akonpainamendu zerbitzua» egiten dutela adierazi du Docampok, pertsonak erdigunean jarriz. Zentzu horretan, «pertsonak ondo ezagutzea eta haiek entzutea funtsezkoa» dela baietsi du. Profesionalen laguntzarekin, erabiltzaileek erabakitzen dute «zer egin nahi duten haien bizitzekin, bizitza proiektu bat eraikitzeko eta bizi kalitate ona izateko». Docamporen arabera, Garaguneko pertsonak ez dira «zerbitzu baten erabiltzaileak», baizik eta «gainontzeko herritarrek adina eskubide» dituzten pasaitarrak.
Garagunen jarduera mordoa egiten dituzte astean, hainbat esparrutakoak, eta bertako pertsonek egin eta proposatzen dituzte. Pertsona guztiek plan bat dutela zehaztu du arduradunak, eta bakoitzak «gustu, interes eta erritmo ezberdinak» ditu. Aldagai horiek kontuan hartuta egiten dute lan Trintxerpen, pertsona erdigunean jarrita eta komunitatean lan eginez; izan ere, jarduerak ez dira soilik ate barrura mugatzen, Trintxerpeko egunerokoan parte hartzen baitute. Eragileen arteko sare bat dute eraikia.
Festetako protagonistak
Trintxerpeko karmenak lehertzear dira, eta Garaguneko kideek botako dute aurtengo txupinazoa. Urduri daude, herriaren ordezkari izango direlako, baina, «harrotasuna eta poztasuna» dute. Suziria pizteko unea «magikoa» izango dela ziur dira, eta «dena emango dutela» hitzeman dute.
Txupinazoak «aniztasun funtzionala lehen lerroan» jarriko duela baietsi du Docampok, «ikusgarritasuna emanez eta gaia normalizatuz». Horrez gain, ziur dira zentroari ikusgarritasuna emango diola, urte osoan egiten duten lana herriari ezagutarazteko.
