"Espazio publikoetako zikinkeriagatik" kezka azaldu du Lezoko EAJk
Lezoko EAJren ustez "udalerriaren hondamenaren aurrean" neurriak hartu behar ditu udal gobernu taldeak, "espazio publikoetako zikinkeriagatik" kezka azaldu du.
Pintaketak, Bekoerrota kiroldegian.Lezoko EAJ Lezoko EAJren ustez “udalerriaren hondamenaren aurrean” neurriak hartu behar ditu udal gobernu taldeak, “espazio publikoetako zikinkeriagatik” kezka azaldu du. Zehazki, herriko hainbat hiri altzari eta eremutan, zikinkeriaz gain, pintaketak eta kartelak daudela adierazi du, eta EH Bilduri eskatu dio garbitasuna indar dezala, eta elkarbizitzarako ordenantza bete dezala.
Laura Martinez Lezoko EAJren eledunaren arabera, “Lezoko kaleen egungo egoera ezin da normalizatu”. Haren ustez herria garbi izatea presaz zuzendu beharreko gaia da, “abandonu irudi bat transmititzen dute”. Erantzun irmo eta iraunkorrak eskatu dituzte jeltzaleek, “ez bakarrik garbitasunari dagokionez, baita intzibismoaren prebentzioari dagokionez ere”. Udalak horiei guztiei aurre egiteko tresnak badituela uste du EAJk, “baina borondate politikoa beharrezkoa da. Bizikidetzari buruzko ordenantza ezin da paperean bakarrik geratu”.
Gainera, bizikidetza arauak betetzen ez dituztenei zigorrak jartzen hasteko eskatu du Martinezek, hiri ingurunea zaintzea errespetu kolektiboko kontua dela iritzita: “Udalerria hondatzen dutenek beren gain hartu behar dituzte ondorioak. Lezo zaintzea erantzukizun partekatua da, eta udalak bermatu behar du hala izango dela”.
