Energia eredua sendotzeko, 120.000 euro aldunditik Oarsoaldera
Gipuzkoako Foru Aldundiko Jasangarritasun departamentuak eta Gipuzkoako eskualdeetako garapenerako hamar agentziek hitzarmena sinatu dute gaur, energia eredua sendotzeko.
Jose Ignacio Asensio eta Joana Mendiburu, gaurko hitzarmen sinaketan.Gipuzkoako Foru Aldundia Gipuzkoako Foru Aldundiko Jasangarritasun departamentuak eta Gipuzkoako eskualdeetako garapenerako hamar agentziek hitzarmena sinatu dute gaur, energia eredua sendotzeko. Zehazki, 2026 eta 2027 urteetarako da hitzartu den diru laguntza, eta Oarsoaldea Garapen Agentziak urte bakoitzeko 60.000 euro jasoko ditu. Eskualdeetako energia planak indartzea; eta energia trantsizio bidezko, iraunkor eta herritarrengandik hurbil baterantz aurrera egiten jarraitzea du helburu aldundiaren ekarpen ekonomikoak. Oarsoaldeari dagokionez Joana Mandiburu Oiartzungo alkate eta eskualdeko garapen agentziako administrazio kontseiluko kideak sinatu du akordioa, Jose Ignacio Asensio Jasangarritasun diputatua izan delarik aldundiaren ordezkari. Osotara, 1,2 milioi bideratuko ditu aldundiak zeregin horietara, hamar tokiko agentzietako bakoitzari 120.000 euro emango dizkie bi urtean.
Jasangarritasun-diputatu Asensiok nabarmendu du hitzarmen horiekin egonkortasuna emango zaiela eskualdeen energia-plangintzari, “eta hurbiltasunean, erakundeen arteko lankidetzan eta pertsonekiko konpromisoan oinarritutako trantsizio energetikoko eredu bat indartzen dugu. Trantsizio energetikoa lurraldetik eraikitzen da, tokiko errealitate bakoitzera egokitutako irtenbideekin”.
Joana Mendiburu, hitzarmena sinatzen. Argazkia: Oarsoaldea Garapen Agentzia.
Eskualdeko bakoitzeko agentziek hainbat lan ildo komun partekatuko dituzte, baina tokian-tokian konpromiso propioak ere izango dituzte. Hala, hitzarmenean jasotako gai komunak honakoak dira: udalekin elkarrizketa teknikoa izatea, eskualdeko energia-plangintza bultzatzea, Energiaren Eskualdeko Mahaiak dinamizatzea eta Energia Jasangarriaren eta Pobrezia Energetikoaren Gipuzkoako Lurralde Mahaian integratzea. “Gobernantza-eredu horrek administrazioen arteko jarduera koordinatua errazten du, ezagutza trukatzea errazten du eta lurralde bakoitzaren beharretara egokitutako erantzunak eskaintzea ahalbidetzen du”, zehaztu du Asensi0k
Hitzarmen berriaren bidez, datozen bi urteetan hainbat jarduera estrategiko garatuko dira eskualdean Oarsoaldea Garapen Agentziak adierazi duenez. Honakoak dira:
- Eskualdeko Energia eta Klima Plan berria prestatzea, datozen urteetako erronkei ikuspegi partekatu batetik erantzuteko.
- Energia-pobreziaren egoera aztertzea, diagnostikoa osatzea eta arlo honetan lanean ari diren eragileekin batera irtenbide eraginkorrak garatzea.
- Hirugarren sektoreko mugikortasunaren energia-eraginkortasuna lantzea, eskualde mailako azken kilometroko banaketa jasangarri baterako aukerak aztertuz.
- 50/50 programa garatzen jarraitzea, ikastetxeetako haur eta gazteen artean energia-aurrezpena eta jasangarritasuna sustatzeko.
