Euskal Selekzioaren ofizialtasunaren alde, ostegunean Lezon
Gure Eskuk deituta eta herriko kirol elkarteen babesarekin elkarretaratzea egingo dute 19:30ean, saskibaloi kantxan.
Euskal Selekzioaren ofizialtasuna aldarrikatzeko elkarretaratzea egingo dute ostegunean (hilaren 16an) Lezon, Lezotarra tabernaren ondoan, saskibaloiko kantxa den horretan 19:30ean hasita. Gure Eskuk mamitutako deialdiarekin Lezoko kirol elkarteek bat egin dute. Elkarretaratzearen ondoren Piztu Lezoren 3x311Gara saskibaloi lehiaren partidak jokatuko dira.
Lezoko kirol elkarteen atxikimendu zabala lortu du Gure Eskuk. HITZAri esan dionez, oraindik ere eragile gehiagoren babesa lortzeko lanean ari dira. Honakoak dira oraingoz deialdiarekin bat egin dutenak:
- Allerru Kirol Elkartea.
- Arkirun Pilota Kluba.
- Jaixki AF.
- Gaintxu AFT.
- Sats Herri Kirol Taldea.
- OMK Kirol Kluba.
- Munttarpe Eskubaloi Kluba.
- Kurkubi SBK.
- Xoxolur Mendi Kluba.
- Lezo Jaizkibel Mendi Lasterketa.
- Lezoarrak Korrikalari Taldea.
- Gure Esku Lezo.
Elkarretaratzean Euskal Selekzioen ofizialtasunari buruzko irakurketa egingo dute deitzaileek. “Bultza dezagun euskal selekzioa eta erakuts dezagun munduko nazio bat dagoela hemen: Euskal Herria”, esango dute: “Zazpi lurraldeetako euskal herritarrok ordezkatzen gaitun selekzioa euskal selekzioa da, eta horregatik diogu elekzio horrek bere lekua izan behar duela edozein kiroletan eta nazioarteko edozein txapelketa ofizialetan”.
