PPA Lezoko trenbide sarbideko tunela berritzen ari da
Portuak 1,7 milioi euroko inbertsioa egin du, eta lanek hiru hilabeteko iraupena izango dute. Helburua da bidea nazioarteko zabalerara egokitzea.
Pasaiako Portu Agintaritzak (PPA) 1,7 milioi euroko inbertsioa egin du Lezo-Errenteriako geltokiarekin lotzen duen Lezoko trenbide sareko tunelaren bidea berritzeko. Jarduketak martxan dira jada, eta hiru hilabeteko iraupena izatea aurreikusi du portuak.
Azpiegitura hori Gipuzkoako dartsenaren trenbide bidezko lau loturetako bat da, eta ohiko zabalera eta 375 metroko luzera duen trenbide bakarra du. Gaur egun, 1.250 trenek zeharkatzen dute tunel hori urtero, batez ere ibilgailuz beteta, portuko trafiko nagusietako bat den Noatum-UECCko ibilgailuen terminalera joateko.
Trenbidea modernizatzeaz gain, obrak nazioarteko zabalera ezartzea ere barne hartzen duela jakinarazi du PPAk, Europako zabalera duten trenentzako sarbidea prestatuz eta errei horretako trafikoak handitzeko aukera emanez.
“Jarduera horiekin, etorkizunean Lezotik barrena nazioarteko zabalerarekin lotutako trafikoak handitzea espero dugu, eta gure helburu estrategikoetako bat bultzatzen jarraitzea, trenbidez portura iristen diren salgaien ehunekoa handitzea eta arku atlantikoaren logistika indartzen laguntzea”, adierazi du Izaskun Goñi PPAko presidenteak.
COMSA S.A.U. enpresari esleitu zaizkio lanak, eta hiru hilabeteko iraupena izatea aurreikusi du PPAk. Sarbidea mugatua egongo da lehen bi hilabeteetan, hirugarren haria ezartzeko egiten ari diren obrak direla eta, ADIFek hilaren 25etik irailaren 7ra bitartean Sare Nagusian egingo duen mozketa orokorrarekin bat etorriz.
PPAk, gainera, merkantzien zabalera metrikoa Herreratik sartzeko lanak ere hasi ditu, hirugarren hari baten bidez nazioarteko zabalera izango duena.
