Bizi Errenteria kanpainaren zortzigarrena
2020an abiatu zenetik, Bizi Errenteria tokiko kontsumoa sustatzeko eta herriko ekonomiari bultzada emateko tresna eraginkorra izan dela jarri du nabarmen udalak.
Zortzigarrena ere heldu da. Errenteriako Udalak, martxan jarriko du Bizi Errenteria Bonu kanpaina, eta herriko merkataritza, ostalaritza eta zerbitzu establezimendu guztiak bertan parte hartzera gonbidatu ditu.
2020an abiatu zenetik, Bizi Errenteria tokiko kontsumoa sustatzeko eta herriko ekonomiari bultzada emateko tresna eraginkorra izan dela jarri du nabarmen udalak, ” 2026ko edizioaren helburua ere bera da: hiri-merkataritzaren ehuna sendotzen jarraitzea, tokiko establezimenduen jarduera sustatzea eta herritarren kontsumo ohiturak gertuko merkataritzaren alde bideratzea”.
Aurtengoak berrikuntza garrantzitsua izango du bonuen banaketan. Orain arte ez bezala, bonuak ez dira etxeetara bidaliko, eta herritarrek ez dute aurrez deskargatu edo inprimatu beharrik izango. Horren ordez, kanpainara atxikitako establezimenduetara joan eta bertan eskuratu ahal izango dituzte bonuak, erosketa egiteko unean bertan.
Kanpainaren arrakasta, neurri handi batean, tokiko establezimenduen parte hartzearen menpe dagoela adierazi du tokiko erakundeak. Horregatik, udalak sektoreko profesional guztiak animatu nahi ditu iniziatibarekin bat egitera eta bezeroei bonuen bidez eskaintzen diren abantailez baliatzeko aukera ematera.
Atxikitzeko eskaera hiru bidetatik aurkez daiteke: Errenkoalde elkartean, udalaren erregistro elektronikoaren bidez edo ZU! arreta zerbitzuan. Eskaera onartu ondoren, udalak parte hartzaileen zerrenda argitaratuko du webgunean, eta establezimenduei kanpaina garatzeko behar duten informazioa eta publizitate materiala helaraziko dizkie.
Aurreko kanpainetan parte hartu duten establezimenduek ere berriro egin behar dute atxikitzeko eskaera, parte hartu ahal izateko.
Informazio bilerak irailean
Kanpainaren funtzionamendua eta aurten erabiliko den aplikazio mugikor berria ezagutarazteko, merkatariei zuzendutako bi informazio-saio antolatu dira: Irailaren 8an (asteartea), 14:00etan, Reina Aretoan (Xenpelar kalea, 3. Erdialdea) eta irailaren 10ean (osteguna), 14:00etan, Aldakonean (Aldakonea kalea, 2. Beraun).
Leire Maziziorrek, Ekonomia Garapeneko zinegotziak, herriko negozio guztiak kanpainan parte hartzera animatu ditu: “Bizi Errenteria tokiko merkataritza indartzeko tresna baliotsua da. Herriko establezimenduen parte hartzea ezinbestekoa da ekimenak arrakasta izan dezan; horregatik, guztiei dei egiten diegu kanpainara atxikitzeko eta Errenteriako merkataritza bizi eta lehiakorra eraikitzen jarraitzeko. Eskerrak eman nahi dizkiegu, halaber, egunero herriari bizia ematen dioten establezimendu guztiei.”
