Urrian hasiko dira Donibaneko saneamendu sistema berritzen
Lehen faseko lanak dira, eta Bizkaia plazaren inguruan, Juan XXIII kalean, eta Donibane kalearen hasieran hasiko dira saneamendu sistema berritzen, eta gas azpiegitura jartzen.
Gipuzkoako Foru Aldundiko Jarrangarritasun Departamentuak jakinarazi du urrian hasiko direla Donibaneko saneamendu sistema berritzeko lanen lehen fasearekin. Jada esleitu ditu obra horiek, 1,35 milioi euroko kostuarekin. Ansareo Obras, Cosntrucciones y Conservacion SAri esleitu dizkiote zortzi hilabetean gauzatu beharko diren jarduketa horiek; lehen fase horretan Bizkaia plazaren inguruan, Juan XXIII kalean, eta Donibane kalearen hasieran izango dira saneamendu sistema berritzen, eta gas azpiegitura jartzen.
Urte askoz blokeatuta izan da saneamendu sistemaren biziberritzea. Sanjuandarren eskaera historikoa izan da horri ekitea. Izan ere, Donibaneko kasko historikoko etxebizitzetako ur zikinak zuzenean badiara isurtzen dira, eta behin lanak osotasunean egiten direnean ur horiek dagokion araztegira joango dira, ez itsasora. Hala, euri urek euren hoditeria sistema propioa izango dute, eta ur zikinak aparteko sistema batetik joango dira Loiolako araztegiraino. Lur azpiko lanak eginda, gainazaleko zoladurak, hiri zerbitzuak eta espazio publikoak berrituko dira.
Saneamendu lan horien desblokeoa Pasaiako Udalak, URA Uraren Euskal Agentziak, Añarbeko Uren Mankomunitateak eta aldundiak berak lortutako akordioari esker eman da. Hala, lanen finantzazioa ere elkarbanatua izango da: udalak kostuaren %35 hartuko du beregain, aldundiak %30, URAk %20 eta Añarbek %10.
Aldundiak obren exekuzio tekniko osoaren ardura hartuko du. Horren barruan daude lizitazioa, kontratazioa, obra zuzendaritza eta ikuskapena. Bestalde, Pasaiako Udalak jarduketarako behar diren lurrak jarriko ditu eskuragarri. Horrez gain, euri urak jatorrian bereizteko lanak egingo ditu udalak, saneamendu sarera ez daitezen iritsi, eta trafikoaren, mugikortasunaren, herritarrekiko komunikazioaren eta obretan sor daitezkeen gorabeheren koordinazioa bere gain hartuko du.
Jose Ignacio Asensio Jasangarritasun diputatuak adierazi du saneamenduaren gaiarekin Donibaneko bizilagunekin “zor historikoa” zegoela, eta behin lanak bukatzen direnean, Pasaiako badiaren ingurumen kalitatea hobetuko dela, “Jasangarritasun Departamentuaren bultzadari eta erakundeen arteko konpromisoari eta lankidetzari esker”.
