Ajerik ez dute
Gaur da jaien egun handia, Madalen Eguna. Eguerdian itzala bilatzen aritu dira EMKE Musika Bandaren kontzertura joan direnak. Herri kirolekin gozatzera ere jende ugari gerturatu da Zumardira, eta Xanti eta Maialen zein buruhandien konpartsak ohi bezala jarraitzaile ugari izan dituzte.
Xanti Maialewn eta buruhandiak EMKE musika bandaren kontzertuan dantzan. Madalen Eguna da gaur, jaien egun handia. Gauekoek merezitako loaldia egiten duten bitartean, dozenaka eta dozenaka herritar atera dira kalera goiz eta eguerdi partean antolatutakoez gozatzera. Eguraldia bero, itzal bila aritu dira Zumardira herri kirolak ikustera jo dutenek. Ez dute lan makala izan enborrak eguzkipean mozten Julen Alberdi Txikio, Mikel Larrañaga eta Iker Vicente aizkolariek, eta harria jasotzen Jokin Eizmendi, Imanol Royo Lartain, Jon Unanue Goenatxo, Elene Ostolaza, Udane Ostolaza eta Estefania Etxebestek. Horiek girotzen aritu dira Elene Ostolaza eta Jon Alkain trikitilariak.
Berdin-berdin, ibili dira EMKE Musika Bandaren Madalen kontzertura bertaratu direnak ere. Foru Plazan aritu dira bandakoak eta garaiz ibili direnek gerizpean lortu dute leku preziatua kontzertua jarraitzeko eroso. Berandu ibili direnek, berriz, abaniko eta aterki festa izan dute eguzkitik babesteko.
Berezia izan da kontzertua, aurten ere. Xanti eta Maialenek eta buruhandien konpartsak musika bandaren erritmora dantzatu dituzte Diana eta Zentenarioa. Aurretik konpartsak ibilbidea egin du Erdialdeko kaleetan barrena eta korrika jarri ditu haur eta gaztetxoak maskuri kolpeak saihesteko.
Arratsaldean, haurren danborradak izango dira protagonista nagusiak. Dozenaka eta dozenaka haur eta gaztetxok beteko dute herria danbor eta barril hotsez. Alaberga auzotik abiatuko dira 18:00etan eta Zumardian emanaldi bateratua egingo dute.
Egitarau osoa kontsultatzeko, egin klik hemen.
