Isuria Zubitxo errekan
Lezoko Udalak zehaztu du herritar baten bidez izan zuela isuriaren berri, eta berehalakoan joan ziren hara teknikariak egoera aztertze aldera.
Zuri kolorez zikinduta azaldu zen atzo Zubitxo erreka.Lezoko Udala Atzo (hilak 21, asteartea) isuria izan zen Zubitxo errekan, Lopene auzoko plaza ondotik igarotzen den horretan. Lezoko Udalak zehaztu du herritar baten bidez izan zuela isuriaren berri, eta berehalakoan joan ziren hara teknikariak egoera aztertze aldera. Industriaguneko pabiloi batetik zetorren isuria, gaizki konektatutako arraska batetik sortua.
URA Uraren Euskal Agentziako teknikariek egiaztatu ahal izan zuten, enpresako arduradunen azalpenak jaso ondoren, isuritako produktua ez zela bereziki kaltegarria, eta errekaren beraren jarioarekin onera egingo duela. Hala ere, animalia kalteturen bat balitz horren azterketa egingo du URAk.
Lezoko Udalak eskerrak eman dizkie isuriaren berri eman zieten herritarrei. Izan ere, halakoak gertatzen direnean funtsezkoa da ahalik eta azkarren isuri horien jatorria identifikatu eta beharrezko jarduketak egitea. Hala, udal erakundeak gehitu du isuriak antzematen direnean udalera edo 112 telefono zenbakira deituta sala daitezkeela.
