Uholde arriskua denean, abisu sistema Donibanerako
Itsas jatorriko uholdeen berri emateko abisu sistema "aitzindaria" aurkeztu dute gaur Donibaneko Santiago plazan.
Donibaneko Santiago plazan aurkeztu dute aldundiko, udaleko, AZTIko eta Euskalmeteko ordezkariek abisu sistema.Gipuzkoako Foru Aldundia Itsas jatorriko uholdeen berri emateko abisu sistema “aitzindaria” aurkeztu dute gaur Donibaneko Santiago plazan. Itsas uholdeen aurrean, udalerriko zonalderik kalteberenena baita sanjuandarren bilgune den plaza hori, itsasoak gora egiten duenean handik sartzen baita ura plazara, kaleetara, eta han diren lokaletara. “Sistemak uholde arrisku handia antzematen duenean, Pasaiako Udalak komunikazio protokolo bat aktibatuko du, arriskuan egon daitezkeen herritarren ezaugarrietara egokituta”, azaldu du Gipuzkoako Foru Aldundiko Jasangarritasun departamentuak.
Informazioa udalaren webgunearen, sare sozialen, Telegram kanalaren eta udaleko informazio pantailen bidez zabalduko da: “Arrisku handien den egoeretan, informazio oharrak jarriko dira kaltetuak izan daitezkeen atarietan, eta Udaltzaingoak zuzenean emango dizkie abisuak herritarrei. Arreta berezia eskainiko zaie adineko pertsonei, bereziki emakumeei, eremu horretako biztanleen artean talderik ugariena direlako”.
Baina, abisua eman aurretik, nola detektatuko da uholde arriskua dagoela? Horretarako formula matematiko bat garatu du AZTIk. Formula horrek ilargi marea, olatuak, itsasoaren maila eta portuko uraren mugimenduaren datuak aintzat hartuko ditu; prebentzio neurri horien lehen faseko zeregina izan da formula hori garatzea.
Bigarren fase batean eredua balioztatu eta hobetuko dute, Euskalmeten iragarpenekin integratuz. Horrela, arriskuaren adierazlea aterako da, eta horren arabera abisu sistema eta komunikazio protokoloa indarrean jarriko du Pasaiako Udalak. Gainera, Santiago plazan jada aurretik erabiliak izan den barrera sistema jarriko du Pasaiako Udalak itsasoko ura Donibaneko alde zaharreko kale eta lokaletara sar ez dadin.
Gaur aurkeztu dute sistema Gipuzkoako Foru Aldundiko Jasangarritasuneko diputatu Jose Ignacio Asensiok, Pasaiako alkate Teo Alberrok, eta aldundiko Ingurumen Administrazioko zuzendari Gloria Vazquezek. Bertan izan dira, halaber, Iraitz Pazos Pasaiako Ingurumen zinegotzia, Joana Auzokoa Pasaiako Ingurumen teknikaria, eta Irati Epelde eta Pedro Liria AZTIko ikerlariak.
Jasangarritasun Departamentuak eta Pasaiako Udalak bultzatu dute ekimena, eta AZTIk eta Euskalmetek garatu dute. Horren aurrekontua 35.876 eurokoa da. Horretarako, AZTIk Santiago plazarako berariazko adierazle bat garatu du. Euskalmetek, berriz, sistema baliozkotzen eta iragarpen meteorologiko eta ozeanografikoekin integratzen parte hartzen du, adierazlea herritarrentzako benetako aurretiko abisu sistema bihur dadin.
