Notarekin gainditu du herritarren azterketa udalerriak
Bizileku gisa 7,5eko nota eman diote herritarrek Errenteria-Oreretari eta udalaren kudeaketaren balorazio positiboa egin du galdetutakoen %57,6k.
Bizileku gisa balorazio ona egin diote herritarrek Errenteria-Oreretari. Hala erakutsi berri dute maiatzean Aztiker Soziologia Ikerguneak egindako 601 inkestek. Horiek 7,5eko nota eman diote udalerriari bizileku gisa, eta udalaren kudeaketa positiboa dela uste dute galdetutakoen %57,6k.
Arazoen artean, aipu gehien, etxebizitza eta aparkaleku falta. Horiei aurre egitea izango dela datozen urteetako lehentasunetako bat azaldu du udalak, “herritarren %63k gazteen eta adinekoen beharrak asetzea eskatu baitu”. Inkestak egiteko garaian adinaren eta sexuaren araberako kuotak erabili dituztela azaldu du udalak, lagina udalerriko biztanleriaren errealitatearen adierazgarri izan zedin”.
Baloratuenen artean, udalerriak inguruarekin duen komunikazio ona, herrian denetik eskura izatea, eta bertan den bizitza soziala eta giroa. etxebizitza falta da arazo nagusiena, eta horren atzetik aparkalekua; hirugarren postuan, segurtasun falta aipatu dute inkestatuek.
Udal gobernuaren kudeaketa ere aztertu dute inkestaren bidez. Balorazio orokorra 10etik 6,3koa da eta herritarren gehienak, %57,6k balorazio positiboa egin du: %14,6k dio Errenteria-Oreretako arazoak konpontzen ari dela, eta %43k uste du badakiela nola konpondu. oposizioaren gaineko iritzia ere galdetu dute inkestan, eta herritarren herenak, %33,4k uste du ez duela ez laguntzen ezta oztopatzen ere.
Udal ordezkarien artean ezagunena herritarren artean Aizpea Otaegi alkatea—%77,3k— baita ondoen baloratu dutena ere 10etik 7ko batez bestekoarekin. Haren gaineko ezaugarri aipatuena berriz, gertutasuna.
Udaletxera joatean jasotako arretari eta kultur eskaintzari buruz pertzepzio ona herritarrek; %85ak baino gehiagok balorazio positiboa egin du bi kasuetan. Telefono bidezko arreta ere egoki baloratu dute. Etorkizuneko ardatzei begira, ondokoak nabarmendu dituzte: Gazteen eta adinekoen beharrak asetzearekin, azpiegiturak eta instalazioak hobetzearekin, eta tokiko ekonomia indartzearekin zerikusia dutenak.
Proiektu zehatzen gainean galdetuta, berriz, gazteen etxebizitza aukerak hobetzea, etxebizitza gehiago eraikitzea sustatzea, aparkeluko disuasorio gehiago eraikitzea, eta herritar helduen zaintzan gehiago inbertitzea.
Inkestaren emaitza osorik irakurtzeko, klik egin hemen.
