Elizalde auzoko bigarren eskuko etxebizitza tasatu bat zozkatu du udalak
Etxe berrien salerosketa ez ezik, bigarren eskukoena ere udalak kudeatzen du. Horrela bermatu egiten du udalak etxebizitza tasatu denak legez dagokien prezioan saltzen direla.
Oiartzun etxebizitza tasatuak zozketa_uztaila 26Oiartzungo Udala Etxebizitza tasatuen salerosketaren eskumena bere egin zuenetik, bigarren aldiz egin du zozketa mota horretako bizilekua esleitzeko Oiartzungo Udalak. Apirilean egin zuen lehena, eta gaur bertan egin du bigarrena. Elizalde auzoko bigarren eskuko etxebizitza tasatu bat zozkatu du gaur ziren 117 familia eskatzaileen artean esleitzeko. Landetxe Kultur aretoan izan da zozketa, eta etxebizitza esleitzearekin batera, itxarote zerrendaren hurrenkera ere ezarri du.
Gaurko zozketaren bidez etxebizitza egokitu zaion familiak udalaren jakinarazpena jasoko du. Hortik aurrera, 20 eguneko epea izango du—hamar egunetan luzagarria— baldintza guztiak betetzen dituela bermatzen duen dokumentazioa aurkezteko. Epe horretan esleipendunak etxebizitzari uko egingo balio, edota beharrezko agiriak aurkeztuko ez balitu, itxarote zerrendako lehenengoari eskatuko dio udalak dokumentazioa.
Oiartzungo Udalaren Etxebizitza Plan Integralaren barruan kokatu du Joana Mendiburu Garaiar alkateak etxebizitza tasatuen kudeaketa eta salerosketa, “etxe berrien salerosketa ezezik, bigarren eskukoena ere udalak kudeatzen du. Horrela bermatu egiten du etxebizitza tasatuak legez dagokien prezioan saltzen direla”. Etxebizitzaren prezioa zehazteaz gain, eroslea izendatzeko eskumena ere udalak du.
Horren atzean, etxebizitzaren gaia lantzeko udalaren urte luzeetako lana jarri du Mendiburuk, “estrategia bat trazatzen eta halako neurri eta erabakiak hartuta desio den etorkizuneko Oiartzun irudikatu eta herritarren beharretara egokituko den etxebizitza plana izatea bilatzen da”.
Bide horretan, gainera, ezinbestekoa jo du Mendiburuk bigarren eskuko etxebizitza tasatuen salerosketa udalaren eskumenekoa izatea, “espekulazioa saihestuko, herritar zaurgarrienak babesteko, eta etxebizitza bizileku gisa lehenesteko”.
Udalak eskumen hori bere egin zuenetik honaino egindako bidearen baloraziorako tartean hartu du, bestalde, alkateak: “Apirileko zozketaren berri eman zenetik, etxebizitza tasatuen eskatzaileen udal erregistroko izen emateek %25 egin dute gora. Beharra badagoela erakusten du horrek, eta udala, bere esku dagoen guztia egiten ari da horri ahal bezain fin erantzuteko”.
Hori horrela, gogora ekarri du Mendiburuk erregistroan izena ematea beti zabalik dagoela ezarritako baldintzak betetzen dituzten herritarrentzat, “salmentarako etxebizitza tasaturik izanez gero, izan berria edo bigarren eskukoa, hiru hilero egiten dira zozketak. Herritarren Arretarako Bulegora joan behar da izena ematera”.
Zozketan parte hartu duten behin betiko zerrendako familia guztiek dute zozketaren emaitza ikusteko aukera SMS bidez jaso duten kode bidez.
