Herritarrek gobernu taldearengan duten konfiantzak behera egin duela dio PSE-EEk
Udalak egin duen inkestaren harira egin ditu adierazpenak alderdi sozialistak.
PSE-EEko Almudena de la Torre, Isaac Palencia eta alberto Muñagorri artxiboko irudi batean.PSE-EE Maiatzean Aztiker Soziologia Ikerguneak egindako inkesten berri eman berri du aste honetan Errenteriako udalak. 7,5eko nota eman diote herritarrek Errenteria-Oreretari eta gobernu taldeari 6,3koa. Politikoen lanaren gainean ere galdetu du Aztikerrek inkesta horretan, baita haien ezagutzaren gainean ere. Ezagunena Aizpea Otaegi alkatea da, galdekatutako %77,3k ezagutzen du; bigarren ezagunena, PSE-EEko bozeramaile Isaac Palencia da, baina oso atzetik, 34 puntu gutxiagorekin, alegia. Maite Gartzia Elkarrekin Errenteriako bozeramailea da hirugarren ezagunena %39,9rekin, Bernar Lemos (EH Bildu) ondoren %35,2, Eli Murua EAJren bozeramailea bosgarrena %29,4rekin eta azkena, PPko Antonio Vicente %9,7arekin.
Egiten duten lanaren balorazioaren arabera, Otaegik jaso du notarik onena batez beste, 7 batekin. Bernar Lemos da bigarrena zerrenda horretan, 6,7ko notarekin; Maite Gartzia hirugarren 5,8ko notarekin eta Eli Murua da herritarren balorazioaren arabera gainditua lortu duen azkena, 5,4 batekin. PSE-EEren bozeramaile Isaac Palencia eta PPren bozeramaile Antonio Vicente dira inkesta horretan herritarren gainditua lortu ez duten ordezkari bakarrak: 4,8a eman diote Palenciari, eta 3,4ko nota Vicenteri.
Inkestaren irakurketa egin du orain alderdi sozialistak, komunikabideetara bidalitako prentsa ohar bidez. Sozialisten esanetan, inkestak “argi erakutsi du” gobernu taldeak udalerriaren arazoak konpontzeko duen gaitasunaren gaineko konfiantzak behera egin duela. Balorazio horretan, duten larritasunarengatik hautsak harrotu zituen eta Oreretako mugimendu Feministak hainbat alderdiri euren interes politikoen mesedetarako baliatu izana egotzi zien gaiari ere egin dio aipamena alderdi sozialistak prentsa ohar horretan. Izan ere, udalaren inkesta hori maiatzaren 4an eta 20aren artean egin zela jarri du agerian, “Kukai eta Xenpelar Bertso Eskola kasuen kudeaketaren aurretik, eta Fanderiako igerilekuen estalkiaren zigorra publiko egin aurretik. Horrek erakusten du konfiantza galera gertaera horiek izan aurretik bazegoela jada”.
Udalak balorazioa egiterakoan nabarmen jarri moduan etxebizitza eta aparkalekua dira herritarren kezka nagusiak, kezka horiei, beste bat gehitu die PSE-EEk, kirola: “Estrategikoak diren proiektuetan aurrerapenik ez da, Gamongoa eta Perutxene kasu, eta agindutako 400 aparkaleku plazak Olibet eta Altzaten egin gabe jarraitzen dute. Kirol instalazioak ere azaldu dira kezka iturri gisa, kudeaketa arazoak direla eta”.
Harago jo du Isaac Palencia sozialisten bozeramaileak, eta inkestak mezu argia utzi duela esan du, “ez du Errenteria ezbaian jartzen, herritarrentzat arazo direnei gobernu taldeak erantzun eta konpontzeko gaitasuna baizik”.
