Tripa betearekin esango diete agur xanistebanei
Arkume jatea egin dute gaur Done Eztebe plazan. Arkume errea izan da izarra, baina paellak ere baditu bere zaleak.
Arkumeak aje guztiak kentzen ditu. Edo hori uste dute oiartzuarrek behintzat. Arkume jatea egin dute gaur ehunka herritarrek Done Eztebe plazan. Paella ere izan dute, eta ez bereziki txikia. Xanistebanak amaitzear dira, eta ba al dago modu hobeagorik ospakizun bat jan ta edanarekin laguntzea baino?
Kamiseta urdina gainean, plaza guztia hartu dute haientzat. Kontzejupeko frontoia ere aulkiz eta mahaiez bete dute. Zaharrak eta gazteak, batera, baina halere, etxeko gazteenak faltan, agian oraindik egun hauetako lo orduak berreskuratzen. Aspalditik ikusi ez diren lagunak ere elkartu dira. “Bizi zea! Xanisteban guzitan ez zaizu ilea ikusi ere!”, esan dio lagun batek beste bati. “Baserrian ez dago inoiz oporrik!”, erantzun dio lagunak.
Arkumea erretzen duten langileek izerdi ederrak bota dituzte, eguzkia ez egon harren, hezetasun handiko eguerdia izan dute eta. Paella sukaldatu dutenak ere ez dira gelditu, ilara erraldoi bati zerbitzatu behar izan diote eta. Arkumea mozten ibili den gizona hobe ez haserraraztea, labanakin duen abilezia ez genuke probatu nahi eta.
Batzuek haien platerak, eta albokoak, bukatu dituzte, eta beste batzuek haiena ere ezin izan dute amaitu. Oiartzungo etxeetako sofa eta ohe asko jendez beteko dira gaur, betekadaren ostean siesta beharrezkoa izaten da eta. Pena Frantziako Tourra jada amaituta dagoela, konbinazio ederra izango litzateke eta: arkumea, tourra eta siesta.
Hona hemen gaur HITZAk ateratako argazkiak:
