Bi auto kiskalita, horietako batean piztutako suaren ondorioz
Gauerdian izan da gertakaria Olatzar bideko lehenengo zenbakiaren parean; suhiltzaileak bertaratu eta haiek itzali dute sua SOS Deiaken abisua jasota.
Erretako bi autoak.Liher Saiz Zarate Sustoa hartu dute gauerdian bizilagunek. Gauerdirako bi minutu falta zirela deia jaso dute SOS Deiaken, Lezon sua piztu dela esanez. Olatzar Bideko lehenengo zenbakiaren aurrean, Pasaia-Lezo Lizeoaren parean ibilgailuak aparkatzeko prestatutako espazioan piztu da sutea, antza erretako autoetako batean. Suhiltzaileak bertaratu dira eta sua itzali, baina bi autoak kiskalita gelditu dira.
Sugar handiak eragin ditu suteak, eta zuhaizti eta belar eremua bada ere ez da bestelako kalterik izan. Lezoko Udaltzaingoak HITZAri azaldu dionez, gaur goizean izan dute haiek gertatutakoaren berri ez baita herrian udaltzainik gauez. Kiskalita gelditu den autoetako bateko jabearekin harremanetan jartzea lortu du Udaltzaingoak matrikularen bidez; bigarren autoaren kasuan, baina, ez dute momentuz jabea identifikatzerik izan, matrikula ere erre egin delako.
Bizilagun ugari gerturatu zen atzo gauean sua ikusita asaldatuta. Sutea zerk eragin duen ez dute argitzerik izan momentuz, baina badirudi autoetako batean hasi zela sua, eta ondokora zabaldu.
Ondokoa argazkiak eta bideoa Liher Saiz Zaratek HITZAra bidalitakoak dira.
