Donibane, arraunaren epizentro larunbatean
Euskotren eta Euskolabel ligetako erlojupekoak egingo dira larunbatean Pasaiako Badian. Itsasora atera beharko dira traineruak, bi erraldoiak irabazteko asmoarekin: Arraun Lagunak eta Orio.
Pasaiako badian izango dira maila altueneko traineruak larunbatean. San Juan klubak antolaturik, Euskolabel eta Euskotren ligak lehiatuko dira badian. San Juan Koxtapeko bi traineruak bertan izango dira, eta haien guztia emango dute haien zaletuen aurrean maila onena erakusteko. Arraunak festa sortzen du, eta hori herriz herri nabaritzen da, estropadak direnean giroz eta kolorez betetzen baita herria. “Pasaia eta arrauna beti joan dira eskutik hartuta, eta guretzat ohore handia da gure estropada egiten jarraitzea”, azaldu du Ainhoa Martinez Pasai Donibane Koxtape Arraun Elkarteko presidenteak.
Erlojupekoa izango da larunbatekoa. Emakumeena itsas mila terdikoa izango da, hau da, 2.778 metrokoa. Bi luzeetara, beraz, ziaboga bakarrarekin. Gizonezkoena, hiru itsas milara, 5.556 metrokoa. Iaz ezarri zituzten estropadetako errekorrak, Arraun Lagunak emakumeetan (10’38”70) eta Zierbenak gizonezkoetan (19’52”48). Marea igotzen izango dute traineruek, 19:18ean baita gorakoa.
Bi bandera izango dira jokoan. Lehenik, Euskotren ligako emakumeek ekingo diote. Adinberri fundazioak babesturiko bandera izango da, bigarren aldiz, eta hori nabarmendu nahi izan du Rakel San Sebastian Adinberri fundazioko zuzendari nagusiak. “Gure ibilbidea hasi genuenetik, elkarte eta erakunde ezberdinekin harremanak sortzea gure helburuetako bat izan da. Estropada hau horren adibide handia da. Komunitatea sortzea gure helburuetako bat da, guk horrela ulertzen dugu behintzat Adinberri”, esan du San Sebastianek. Larunbatean 17:20ean irtengo dira lehen traineruak.
Bi erraldoi
Arraun Lagunak taldeak irabazi ditu estropada guztiak aurtengo emakumezkoen lehenengo mailan. Emozio askorik gabeko liga dela diote batzuek, baina behera begira oraindik badago lehia. Zumaia da azkena, eta oraingoz berak izango luke zuzeneko jaitsiera ETE ligara. Donostiarrak aldiz, play off postuak ditu, eta Hibaika du aurretik, 10 puntotara. Lau estropada dituzte aurretik, tartean Zarauzko bandera. Play offak iraila amaieran izango dira. Batelerak hirugarrenak dira, 57 punturekin, lehen mailako itzuleran maila ona erakutsiz. Aurrean, Tolosaldea dute, 73rekin.
Mutiletan, aldiz, Orio da ia garaiezina. Ez ditu bandera guztiak irabazi, baina ia ia. Baja asko izan zituen San Juango gizonezkoen traineruak neguan, eta aurreko urteko maila eustea zen aurtengo helburua. Hamargarren postuan kokatzen dira Euskolabel ligan, eta ez dute erraza lehenengo txanda horretatik ateratzea. Halere, gogo handiak dituzte haien uretan arraun egiteko, eta hori bera erakustera joango dira larunbatean.
