Dantza, dantza eta dantza
Dantzartek dantzaren dimentsio guztiak ekarriko ditu Errenteria-Oreretara hilaren 6tik 13ra bitartean
Dantzarteren aurkezpena Lekuona Fabrikan. Dantzaren epizentro izango da Errenteria-Orereta hilaren 6tik 13ra bitartean. Izan ere, Dantzarte Dantzaren Asteak diziplina horren dimentsio guztiak jarriko ditu agerian, udalak dantzarekiko duen konpromisoa erakustearekin batera. Gaur aurkeztu dute Dantzartea Aizpea Otaegi alkateak, Myriam Arkaia Dantza Hirian jaialdiko sortzaile eta zuzendariak, eta Thierri Malandainek eta Carine Agirregomezkortak Malandain Biarritzen izenean. Haiekin batera Dantza Astearekin bat egin duten beste eragileetako ordezkariak.
Egitaraua osatzerakoan, dantzaren ikuspegi eta esperientzia ezberdinak hartzea izan dela helburu nagusietako bat azaldu du Otaegik, “hala, astearenn barruan dantza ikuskizunez gozatzeaz gain, dantzaldietan eta dantza tailerretan parte hartzeko, ate irekietako jardunaldietara gerturatzeko, eta topaketa profesionaletan parte hartzeko aukera ere izango da”.
Programazioaren barruan, gainera, mugaz gaindiko bi jaialdi izango dira: Malandain Ballet Biarritzek antolatutako Maitaldia, eta Dantza Hirian. Bi jaialdi horiek eskainiko dutenari aipamena alkateak, “Maitaldia jaialdiaren barruan, Ballet de l’ Opera Grand Avignonek Martin Harriageren Awen the sacred veil eskainiko du hilaren 11n Lekuona Fabrikan. Dantza Hirian mugaz gaindiko dantza jaialdi ibiltariak berriz, hiru dantza pieza eskainiko ditu hilaren 12an Herriko Plazan eta Zumardian”.
Horrez gain, programaren aniztasun horretan Dobla proiektuari tartea egin zaiola nabarmendu du Otaegik. Gonbidapena alkateak ehrritarrei antolatutako emanaldi eta ekintza guztietan parte hartzera.
Udalerriak dantzarekin duen harreman estua nabarmen jarri du udal agintariak gaurko agerraldian eta Errenteria-Oreretaren ekosisteman duen garrantzia azpimarratu, “dantza Errenterian ez da soilik ikusten, dantza sortu egiten da, dantzaren inguruan topaketak egiten dira, dantzaren esparru profesionala lantzen da, eta dantza erakutsi ere egiten da, baina esango nuke dantzaren dimentsio eta dantza bizitzeko modu guzti horiek, bere isla daukatela programaren baitan eta horrek egiten duela bereziki aberats eta interesgarri, herritar guztientzat era askotako jarduerak eskaintzen dituelako”.
Dantza Astearen programazioaren bueltan eragile ugarik parte hartu dutela ere azaldu du, “Errenterian ohikoa den moduan. Kasu honetan Badalab, OzZinema, Ereintza Dantza Taldea, Dantzagunea, Katapulta plataforma Agustinak Zentroa, Herri arte Eskola eta Beti Prest”.
jaialdiak beste formatu batzuk ere jasoko dituela zehaztu du alkateak. Horren adibide jarri du Ozzinemaren eskutik helduko den Malandain, amodioa gorpuzten denean filma; Lekuona Fabrikan, gainera, dantzarekin lotutako liburu txokoa onduko dute.
Dantza Hirian jaialdiaz aritu da Arkaia. Eskerrak eman dizkio Errenteriako Udalari elkarlanarengatik, eta azaldu jaialdian pieza laburrek izaten dutela leku, “koreografo berrien zertzelada eman ahal izateko, dantza kalera ateratzen du doan erabat”.
Thierri Malandainek ere eskerrak Errenteriako Udalari elkarlanerako aukerarengatik, “bost urte daramagu elkarlanean. Dena uniformea den garai honetan, elkarlanean ari gara, esperientziak partekatzen baina bakoitza bere nortasunetik eta izaera errespetatuta”. Nazioarteko balletei ikusgarritasuna ematea erronka nagusia izan dela zehaztu du Agirregomezkortak bestalde, udalarekin duten elkarlanaren bidez, “urtez urte garatu da konfiantzan eta elkarrizketan oinarrituta, gaur aurkeztu dugun dantza oinarri duen aste beteko programara heltzeko. Dantzak plaza izatearekin ikaragarri pozik gaude, eta babes hau, Errenteriako Udalarena, oso garrantzitsua da jarri duen konfiantza bezain bestekoa”.
Luxuzko programazioa dantzaren bueltan eta horrekin gozatzeko deia antolatzaileek herritarrei, “balia dezagun plaza hori aste honetan zehar, dantza ikusi, ikasi eta gozatzeko”.
Dantzarte egitaraua
IRAILAK 6
- 18:30 IGANDEAK DANTZAN. Zumardia. Dantzaldia.
- 19:00 FURFURIA (Pasarte bat) (Nerea Gurrutxaga). ANGA (Izaro Leregi). Antolatzailea: Katapulta Plataforma. Lekuona Fabrika. Dantza ikuskizuna. Gonbidapenak
IRAILAK 7
- 17:30 NUNAVUT (Myriam Perez Cazabon). Lekuona Fabrika (Plaza Txikia). Dantza tailer familiarra. Izen-ematea.
IRAILAK 7-11
- 9:00-20:00 DANTZA LIBURUTEGIRA DATOR. Lekuona Fabrika. Antolatzaileak: Dantzagunea, Eresbil, Biblioteka. Liburu-txokoa.
IRAILAK 8
- 19:00 AMODIOA GORPUZTEN DENEAN. (QUAND L’AMOUR PREND CORPS). Niessen Zinemak. J.B.A. (euskarara azpititulatua). Antolatzaileak: Ozzinema, Maitaldia. Zinema. Gonbidapenak.
IRAILAK 9
- 10:00-13:30 / 14:30-16:30 DOBLA-ARTIK. Topaketa profesionala: Nola definitzen dugu dantzaren sektorea? Izen-ematea
IRAILAK 10
- FLA FLA FLA (Eneka Bordato). Lekuona Fabrika (Plaza Txikia). Dobla. Dantza ikuskizuna. Gonbidapenak
- 10:00-13:00 Gipuzkoako Dantzagunea. 13:00 Irteera bateratua Agustinak Zentrora. SENTITU DANTZAGUNEA. Antolatzaileak: Dantzaz, Dantzagunea. Ate irekiak. Izen-ematea
IRAILAK 11
- 18:00 EUSKAL DANTZEN ERAKUSTALDIA. Lekuona Fabrika (Kanpoaldea). Ereintza Dantza Taldea. Dantza ikuskizuna.
- 19:00 AWEN, THE SACRED VEIL (Martin Harriague – Ballet de l’Opera Grand Avignon). Lekuona Fabrika. Maitaldia. Dantza ikuskizuna. Sarrerak: 9€
IRAILAK 12
- 18:30 HERRI ARTE ESKOLAKO IKASLEAK. Xabier Olaskoaga Plaza. Antolatzailea: Herri Arte Eskola. Dantza ikuskizuna.
- 19:00 DANTZA HIRIAN: LOLA Y LOS LAMENTOS (Andrea Castro). Herriko Plaza. Dantza ikuskizuna.
- 19:15 DANTZA HIRIAN: A OJO (Compania Carmen Fumero). Herriko Plaza. Dantza ikuskizuna.
- 19:45 FESTA FORMAL (Olaia & Gilles). Zumardia. Dantza ikuskizuna.
IRAILAK 13
- 12:00-13:30 (H)ERRITMOZ. KULTURARTEKOTASUNA DANTZAN. Niessen Kulturgunea. Antolatzailea: Badalab. Dantza tailerra. Izen-ematea
- 12:00 MUXIKOAK. Herriko Plaza. Antolatzailea: Beti Prest Dantza Taldea. Dantzaldia.
- 19:00 MAKIL HOTSAK. Herriko Plaza. Antolatzailea: Hika Teatroa + Oinkari. Dantza ikuskizuna.
