Antxoko San Fermin Txikietarako kartel bila hasi dira
Pasaiako Udalak, Antxoko Jai Batzordearen bitartez, 2026ko San Fermin Txikietarako kartel lehiaketa abiatu du. Irailaren 25etik 27ra izango dira Antxoko festa txikiak.
Pasaiako Udalak, Antxoko Jai Batzordearen bitartez, 2026ko San Fermin Txikietarako kartel lehiaketa abiatu du. Irailaren 25etik 27ra izango dira Antxoko festa txikiak. Pasaian jaio edo bizi diren 10-14 adin tartekoei bideratuta dago lehiaketa, eta lanak DIN-A3 neurrikoak izan behar dira; horiek aurkezteko epemuga hilaren 15a da. Sorkuntzak Antxoko HAZ bulegoan (Hamarretxeta kalean dago), edo Antxoko liburutegian entregatu behar dira.
Adinaren eta kartelen neurriaren baldintzez gainera, beste batzuk bete behar dituzte lehiaketara aurkeztu nahi dutenek. Hala, euskarria sortzeko edozein modalitate artistiko erabil daiteke, baina derrigorrez testu hau agertu behar da: San Fermin Txiki jaiak 2026-Pasai Antxo. Irailaren 25etik 27ra.
Jakina da lan irabazlea barrutiko iraileko festak iragartzeko kartel eta euskarrietan azalduko dela. Alta, irabazlea Jai Batzordeko kideek erabakiko dute, aurkeztu diren hautagai guztien lanak aztertuta. Irabazleak, jaien iragarle izateaz gainera, 60 euroko balioa duen produktu sorta artistikoa jasoko du; bigarren eta hirugarren sariak ere izango dira, horiek 30 eta 20 euroko balioa duten produktuen sorta jasoko dute hurrenez hurren. Saria hutsik uzteko ahalmena izango du batzordeak.
Irabazle izango den lana Antxoko Jai Batzordearen jabetzakoa bihurtuko da; saririk izan ez duten kartelak Kultura eta Hezkuntza sailaren bulegoan jaso ahal izango dituzte egileek.
