Garagaztaño, Gorka eta Jon Telletxea anaien omenez
Garagaztaño artisau garagardoen festa antolatu dute elkarlanean Gorka Telletxea eta Jon Telletxea anaien omenez, hilaren 12rako. Egun osoko egitaraua ondu dute bi auzotarrak oroitzeko.
Gaztañoko frontoiak badu murala. Argazkia: Gaztañoko Auzo Elkartea Maritxu Mozkor jai txikiak antolatu beharko liratekeela esaten omen zuen Jon Telletxeak; Gorka Telletxea anaiak, berriz, artisau garagardo azoka egin beharko litzatekeela auzoan. Ez dute ikusterik izan ez batak ezta besteak ere, baina auzoak, maitasunez, Telletxeatar anaien erronkak hartu eta haien omenez Garagaztaño artisau garagardoen azoka antolatu du. Gaztañoko Jai Batzordera jo zuten hainbat lagunek azokaren ideiarekin, eta batzordeak ez zuen aukera galdu, berehala baiezkoa emanda. Harekin batera, inguruko hainbat garagardogile, auzotarrak eta beste hainbat norbanakoek jositako sarea. Egun osoko festa eguna aitzakia izango da Gorka eta Jon Telletxea anaiei maitasun beteko omenaldia eskaintzeko.
2025eko irailaren 13an hil zen Gorka Telletxea; Jon anai gazteena, berriz, aurtengo martxoaren 2an zendu zen, «egun latzak izan ziren Gaztaño aldean», esan dute auzokideek. Ezagunak ziren biak herrian, eta zer esanik ez hazten ikusi zituen auzoan. Argi adierazi dute jaiaren antolatzaileek: «Hilaren 12an bi anaiak izar artean izango dira garagardo pitxer bana eskuetan, eta haien omenez guk ere topa egin nahi genuke auzoan, Telletxeatar anaiek hain gogokoa zuten artisau garagardoarekin».
Mimo handiz eta are eta maitasun handiagoz antolatu dute egun osoko egitaraua, eguerdiko hamabietan hasi eta gauerdian bukatuko dena. Gaztañon izango diren artisau garagardogileak, honakoak: Versum (Irun), Zanpano (Aizarnazabal), Brewery Land (Zumaia), Bidassoa (Bidasoaldea-Nafarroa), Kaneta (Hendaia), eta Otsaihen (Hernani).
Garagardogile bakoitzak hainbat garagardo mota eramango du azokara, hala azaldu dute antolakuntzatik: «Horiek dastatzeko edalontzia erosi beharko da bi euroan, eta garagardogile bakoitzak erabakiko du zein prezioan saldu bere garagardoa postuetan». Edalontziarekin batera, zozketarako zenbakia jasoko da.
Bazkaria eta musika
Egitarau zabalaren barruan bazkaria antolatu dute. Ekitaldi guztiak erabilera anitzeko gunean egingo dituzte. Bazkari horretarako txartelak salgai dira eta hilaren 7ra arte, astelehena, erosi ahalko dira Arkaitza, Cine Reyna eta Leku Zaharra tabernetan. Menua: saltxitxak, txorizo egosia, karrilerak saltsan eta browniea; horiek denak bultzatzeko artisau garagardoa prezioaren barne, eta ura eta sagardoa ere aukeran. Txartelak 25 euro balio ditu.
Trikitilariek girotuko dute eguerdi partea, eta bazkalostea, berriz, Benetan musika taldeak (16:30) eta Peppermint Sextetek (19:00). Zozketa eta bideoaren txanda helduko da ostean, eta zozketaren irabazleak artisau garagardo sorta jasoko du. 22:30ean Ximaur Punk Oreretako taldeak hartuko du lekukoa. Afaltzeko hanburgesak eta otartekoak izango dira. Egun pasa Gaztañon egiteko aitzakiarik ez da behar, beraz. Gainera, sorpresak ere izango direla aurreratu dute, datu gehiagorik eman gabe, antolatzaileek.
Garagaztañoren atzean direnek eskerrak emateko aukera ere baliatu nahi izan dute. «Egun osoko festa egi bihurtzen parte hartu duten guztiei: eskerrik asko Gaztañoko auzo elkarteari eta jai batzordeari edozertarako prest baitzarete beti; mila esker Udane Ansa Iragorriri, kartel eta logo ezin politagoak sortzeagatik; eta esker mila bazkariko jakiak prestatuko dituzten Gaztelu ostatuko lagunei eta Ibon Appetiti».
Auzotarrei zein auzotik kanpokoei bertaratzeko deia hilaren 12ko Garagaztañora: «Gorka, Jon, zuengatik egingo dugu topa».
