Hiri garraioan maiztasuna ez dela handitu dio PSE-EEk
Sozialisten esanetan U-34 linea desagertu eta hark eskaintzen zuen zerbitzua U-33k hartu du orain. Hiri garraio zerbitzuaren egoera "prekarioa" dela salatu du, gainera.
Urbanoa-Errenteria Gaurtik aurrera Errenteria-Oreretako hiri garraioaren sistemak hobekuntza nabarmenak izango zituela jakinarazi zuen udalak joan den astean eta hobekuntzak zehaztu: U6 linearen geltoki berria eta ibilbidearen aldaketa; U33 linearen maiztasunak handitzea; eta Gaztaño auzorako zerbitzu mota aldatzea.
Hala, azaldu zuen U6 Galtzaraborda-Beraun-Pontika autobus lineak geraleku berria izango duela Jose Maria Usandizaga kaleko 2. zenbakian. Hori horrela, linearen ibilbidea aldatu egingo da, eta San Markos kalea bukatu aurretik Usandizaga kalerantz bira egin, eta San Markos kaleko 15 zenbakiko geralekua kendu egingo du. Hala ere, azaldu zuen udalak geltoki horrek U5 lineari zerbitzua ematen jarraituko diola.
Xenpelar kalea, hirigunea, Agustinak eta Zamalbide lotzen dituen U33 autobusak berriz, areagotu egingo duela maiztasuna azaldu zuen. Lau bidaia gehiago eginda: goizean 10:10ean eta 12:10ean eta arratsaldean, 16:10ean eta 18:10ean.
Bestalde, Bidez Bide zerbitzuak ordezkatuko duela U34 linea jakinarazi zuen, Gaztañotik igarotzean, egungo eskariari egokituta.
Horrekin lotuta prentsa oharra helarazi du gaur komunikabideetara Errenteriako alderdi sozialistak. Gezurtatu egin du hiri garraioaren maiztasuna handitu denik, “U34 autobus linea desagertuta, haren zerbitzua U33 lineara pasa dute. Maiztasuna handitze gisa aurkeztu duena udalak, dagoeneko baziren bidaien berrantolaketa da”. Harago jo du PSE-EEk eta gobernu taldeari “kea saltzea” egotzi dio hiri garraio zerbitzuaren “prekarietatea ezkutatzeko”. Horrekin lotuta esan du, joan den otsailean berritu behar zutela kontratua, “hala ere hiri barruko garraio zerbitzua behartutako luzapen bidez ari da. Maiztasun handiagoak, berritutako autobus flota, edota elektrifikazioa atzeratzea dakar horrek”.
