Lanengatik AP8 errepidea itxiko dute datozen gauetan Oiartzun eta Errenteria artean
AP-8 eta GI-20 errepideen arteko lotunearen bide segurtasuna hobetzeko proiektuaren lanak hilaren 9an hasiko dituzte Bilborantz.
AP-8 eta GI-20 errepideen arteko lotunearen bide segurtasuna hobetzeko proiektuaren lanak hilaren 9an hasiko dituzte Bilborantz. Horiek horrela, irailaren 9tik 11ra, gauero 21:30etatik 04:30etara, AP-8a guztiz itxiko da noranzko horretan Oiartzun eta Errenteria artean, 11,000 eta 13,000 puntu kilometrikoen artean.
Hiru gau horietan Bilboko norabidean AP-8tik ibiliko diren erabiltzaileei honako desbideratzea egingo zaie: Oiartzungo 11. irteeratik atera beharko dute, Arraguako biribilgunean GI-2132 errepidea hartu beharko dute Oiartzungo norabidean, eta autobidea azpitik gurutzatu ondoren, hurrengo biribilgunean Oiartzungo ordainlekuan sartu beharko dute, behin zeharkatuta, AP-8 zein GI-20a Bilboko norabidean hartzeko.
Era berean, hilaren 10etik, ostegunetik, 06:00etatik, urte bukaera arte, eskuineko erreia itxiko da 11,000 eta 13,000 pk artean proiektuan aurreikusitako lanak egiteko.
Obren helburua egungo lotunearen plataforma egokitu eta zabaltzea da, Gipuzkoako errepide-sarearen ardatz estrategiko horren bide segurtasuna hobetuz. Lanak 17 hilabeteko iraupena iznago dute, eta autopistan bertan dauden egiturak handitzeaz gain, zarataren aurkako pantailak jarriko dira, Gipuzkoako Foru Aldundiak errepideetako zarataren aurkako ekintza Planak ezarritakoari jarraituz.
Era berean, eremu horretan dauden bi azpiko pasoetan (PK 11,740 eta 11,950) hainbat jarduketa egingo dira, baita Oiartzungo ordainlekuaren sarrera eta irteerako lotuneetan zein PK 12,000an dagoen zubibidean ere. Bertan bideak zabalduko dira lotune berrira egokitzeko; Bilboko noranzkoan dagoen hegala handituko da eta Behobiako norabidekoa ordezkatuko da; euste-sistema aldatuko da; drainatze-sistemak instalatuko dira; eta pantaila akustikoak jarriko dira. Azken hauek Bilboko noranzkoan eskuineko bazterrean jarriko dira, hortik gertu dauden etxeak zein bertan dauden hainbat elementu babesteko, eta egun dauden pantaila akustikoei jarraipena emanez.
Bidegik 7,3 milioi euroko inbertsioa egingo du bide segurtasuna hobetzen lagunduko duen proiektua gauzatzeko.
