Lehen jardunaldian bikain; bigarrenean, gora begira
Ziabogaraino lehen postuan izan dira 'Madalen' ontzikoak estropada bikaina osatuz. Bosgarren egin dute Hibaikako emakumeek, eta datorren igandeko bigarren jardunaldiari begira urrats bat gora egin nahi dute.
Madalen ontzia atzo Kontxako lehen jardunaldian.Joseba Parron San Sebastian/ Irutxuloko Hitza Estropada ikusgarria Hibaikako emakumeek eskaini zutena Kontxako lehen jardunaldian. Lehen txandan irten ziren Madalen ontzikoak, Tolosaldea, Zarautz, eta Donostiarrarekin batera. Lehen luzea bikaina benetan, Iñaki Mendizabalak prestatutako taldeak; lehenak egin zuten ziabogarainoko tartea. Lehenak sartu ziaboga horretan, baina Tolosaldeak aurrea hartu zien. Hala ere lan ona Errenteria-Oreretakoek, eta bosgarren postua taulan lehen jardunaldia bukatutakoan.
Txartela lortzea zuten helburu Kontxan lehiatzeko, eta hamalaugarren urtez segidan lortu dute. Hortik aurrerakoa, gozatzea, arraunarekin disfrutatzea izango zela adierazi zuen Inge Ugarte patroiak sailkatze estropadaren ostean. Disfrutatu disfrutatuko zuten, baina maila polita erakutsi ere, pozik egotekoa. Tolosaldearekin hiru segundoko tartea izan zuten Hibaikakoek eta oso kontuan hartzeko beste datua, hirugarren eta seigarren sailkatutako lau ontziek bi segundoko tartean egin zutela. Arraun Lagunaken nagusitasuna salbu, agertokia beraz, erabat zabalik Kontxako bigarren jardunaldirako.
Bigarren igandeari begira dira orain Madalen ontzikoak. Koska bat gora egin nahi dute, lehen lauko horretako kide bihurtu Kontxaren bigarren jardunaldian. Hibaika, Donostiarrarekin, Zarautzekin eta Oriorekin lehiatuko da lehen txandan.
Mendizabal pozik azaldu da lehen estropadaren ondotik, “ostegunean, sailkatze estropadan, pisu bat kendu genuen gainetik txartela lortuta Kontxan aritzeko. Ohorezko txandan sartzeko borrokatu dugu, ia lortu dugu, baina bi-hiru segundotan daukagu. Kontent emaitzarekin, eta datorren igandean gogo berarekin aterako gara uretara; bigarren postua bertan daukagu, ea lor genezaken”.
Kontxako lehen jardunaldiko denborak
- Arraun Lagunak 10:49.68
- Tolosaldea +9.18
- San Juan +10.54
- Astillero +10.74
- Hibaika +12.32
- Donostiarra +13.26
- Zarautz +18.08
- Orio +18.46
