Euskara ipar
'Euskara ipar, plan biribila' lelopean, udalak eta euskaltegiek prest dute 2026-2027 ikasturteko matrikulazio kanpaina.
Euskara ipar, plan biribila lelopean, Pasaiako Udalak eta herriko bi euskaltegiek prest dute 2026-2027 ikasturteko matrikulazio kanpaina. Antxoko Txirrita AEK-k eta Trintxerpeko Udal Euskaltegiak pasaitarrak animatu dituzte euskara bere egin dezaten: “Euskara ikastea pauso garrantzitsua da, euskara ulertzera iristea behintzat: lana topatzeko, bezeroei kalitate handiagoko zerbitzua eskaintzeko, euskarazko titulu ofizial bat lortzeko, euskal kultura bete-betean gozatzeko, bizileku eta lan baimenekin lotutako administrazio prozesuetarako, seme-alabekin eskolan ikasitakoa partekatzeko…”.
Laura Ré Euskara zinegotziak adierazi du euskararen normalizazioa udalaren “lehentasun estrategiko” bat dela: “Euskara, gure hizkuntza izateaz gain, komunitatea egiteko tresna da, kohesioa sortzen duena eta aukera gehiago irekitzen dizkiguna. Gure helburua da Pasaian bizi den edonork euskaraz ikasteko eta bizitzeko aukera erreala izatea, bere egoera sozioekonomikoa edo jatorria edozein dela ere”.
Bide horretan, udal hautetsiak baietsi du udalak euskara sustatzeko egiten duen apustua ez dela euskaltegien matrikulazio kanpainara mugatzen, urte osoan zehar garatzen den politika eta egitasmoen parte baita: “Euskararen biziberritzea guztion ardura da, baina erakundeok bidea erraztu behar dugu. Horregatik, prestakuntza eskuragarri egiteaz gain, euskararen erabilera handitzeko baldintzak sortzen jarraituko dugu, Pasaia gero eta euskaldunagoa izan dadin”.
Eskaintza
Pasaiako bi euskaltegietan maila guztietara egokitutako ikastaroak eskaintzen dituzte, ordutegi zabalean. Horien artean langabetuei zuzendutako ikastaro trinkoa nabarmendu dute euskaltegien arduradunek. “Ikastaro horren bidez, euskara azkarrago ikasteko aukera izango dute ikasleek eta lana aurkitzeko aukerak handituko zaizkie, beste abantaila batzuen artean”.
Dagoeneko euskaraz dakiten horiei ere dei egin diete euskaltegietara joateko, haien maila hobetu dezaten, “inoiz ez dela berandu” iritzita. Horrez gain, euskara ez dakitenak ere animatu dituzte Pasaiako euskaltegietan ikastera, abantailak baliatuta.
Udaleko eta euskaltegietako arduradunek ez dute nahi egoera ekonomikoa euskara ikasteko oztopo izatea. Hori dela eta, ikastaroek “arrazoizko” prezioak izango dituztela aurreratu dute. Pasaitarrek, gainera, matrikularen %100 berreskuratu ahal izango dute baldintzak betez gero. Baldintzen artean, ikasleek %85eko asistentzia ziurtatu beharko dute.
Ikastaro bereziak
Aurtengo ikasturtean, aurreko urteetako ikastaro berezien eskaintza mantenduko dutela jakinarazi dute arduradunek: mintzamena lantzeko ikastaroak eta Pasaiako merkatarientzako ikastaroak. Kurtso horien gaineko informazioa euskaltegietara deituta edo bertara gerturatuta lor daiteke.
Ikastaro berezi horiez gain, euskaltegiek ohiko ikastaroak ere eskainiko dituzte iraila bukaeratik ekainera bitartean, 07:00etatik 21:00etara arteko ordutegi zabalean. Kurtso guztiak 16 urtetik gorakoentzat dira, eta ikasleen eskaeren eta beharren arabera, talde eta formula ezberdinak antolatu ahal izango direla zehaztu dute arduradunek.
Hortaz, euskara ikasteko interesa duten guztiei Trintxerpeko Udal Euskaltegira (Euskadi etorbidea 61, 943 00 43 40, posta elektronikoa) edo Antxoko Txirrita AEK Euskaltegira (Zumalakarregi 9, 943 52 55 45, posta elektronikoa) gerturatzeko deia egin diete arduradunek, bertan informazioa eskuratu eta izena emateko. Izen emateak iraila osoan zehar egongo dira irekita. Udalaren Herritarren Arreta Zerbitzuan ere aurretiko izen ematea egin ahal izango da.
