Euskara, denen eskura
Ikasturtea hasi berritan agerraldia egin dute gaur udalak eta udalerriko bi euskaltegiek: Xenpelar AEK-k eta Udal Euskaltegiak.
Leire Mazizior Hizkuntza politiketako zinegotzia, Marian Alberdi Udal Euskaltegiko zuzendaria, Gurutzne Etxeberria Udal Euskaltegiko idazkari akademinkoa, eta Borja Arbelaitz Xenpelar AEKko arduraduna. Ikasturtea hasi berritan agerraldia egin dute gaur udalak eta udalerriko bi euskaltegiek: Xenpelar AEK-k eta Udal Euskaltegiak. Ikasturte berrirako ondu duten eskaintza zabalaren berri eman dute, baita matrikula epea zabalik dela jakinarazi ere; udal euskaltegiaren kasuan, hilaren 18ra arte eman daiteke izena, eta Xenpelar AEKren kasuan, berriz, hilaren 30era arte. Horiek data ofizialak, baina ikasturte osoan zehar izango du euskarara hurbildu nahi duenak izena emateko aukera.
Erabat irisgarria den eskaintza prestatu dute, maila eta ordutegia euskara ikasteko oztopo izan ez daitezen. Leire Mazizior Hizkuntza Politiketako zinegotziak kohesio sozialerako ezinbesteko tresna jo du euskara, “hori horrela herritar orok izan behar du eskuragarri. Euskara ikastea ez baita azterketa bat gainditzea; euskara ezagutzeak tokiko telebista eta prentsa ulertzea dakar, seme-alabei eskolako lanekin laguntzeko aukera ematen dizu, laneratzeko ateak zabaldu, eta komunitatea ehuntzen laguntzen du”. Horrekin lotuta, aurten ere, hobari eta diru laguntza eskaintza zabala izango dela esan du Maziziorrek.
A1 eta A2 Mailako ikastaroetan ziena ematen dutenek, ikastaroa doan izango dute udal euskaltegian; AEKn izena ematen dutenek ere ez dute ordaindu beharko, “HABE euskara bonoa jarri du martxan eta horren arabera, ikasleek 120 euro ordainduko ditu eta gainontzeko guztia HABEk hartuko du bere gain. Errenteriako Udalak 120 euro horiek ordainduko ditu, beraz, ikasleek doakoa izango dute”.
Hortik aurrerako ikastaroetan ere ikasleek diru laguntza zabalak izango dituztela azaldu du Maziziorrek, “eskoletako asistentzia betez gero, ∞80ko hobaria aplikatuko zaio ikasle orori”. Eskaintzari dagokionean, A1, A2, B1, B2, C1 eta C2 mailako tituluak lortzeko taldeak izango dira bi euskaltegietan eta astean 20, 15, 10 eta 5 orduko ikastaroak. Eskolak, goiz, eguerdi eta arratsaldetan, baita autoikaskuntza ere; halaber, erabilera bultzatu eta trebetasunak lantzeko taldeak izango dira.
Udal Euskaltegiaren eta Xenpelar AEKren artean, guztira 49 talde aritu ziren lanean 2025-2026 ikasturtean zehar. Balantzea egin zuen Errenteriako Udalak joan den uztailean eta hainbat datu eskaini. Maila guztietako ikastaroak eskaini ziren aurreko ikasturtean, hasierako urratsetatik hasi eta C2 mailara arte, eta neguko ikastaroetan 600 ikasle inguruk parte hartu zuten. Kopuru hori aurreko 2024-2025 ikasturtekoa baino ia %25 handiagoa da, eta gero eta herritar gehiagok euskara ikasteko edo hobetzeko egiten duten apustuaren adierazgarri tokiko erakundearen esanetan.
Udal euskaltegiak hilaren 18ra arte izango du matrikula epea zabalik, eta hori horrela Migel Zabaletan duen bulegoa zabalik du 09:00etatik 18:30era. Telefonoz ere eman daiteke izena, 943 44 96 80 edo 647 68 09 27 telefono zenbakietara deituta edo posta elektroniko bidez (klik hemen).
Xenpelar AEKk hilaren 30era arte du zabalik izena emateko epea eta bulegoa zabalik izango du astelehenetik ostiralera 09:00etatik 13:00etara eta arratsaldez 17:00etatik 20:00etara astelehenetik ostegunera. Telefonoz ere eman daiteke izena 943 34 02 33 zenbakira deituta edo posta elektronikora mezua bidalita (klik hemen).
