Familia Gunea, Ludoteka eta Gaztelekuetan izena eman daiteke
Errenteriako udalak antolatutako programetan izena emateko aukera izango dute haur, gazte eta familiek hilaren 14tik 23ra arte.
Cruz, Zabala, eta Arozena gaurko agerraldian, beraungo ludoteka aurrean. Errenteriako udalak antolatutako programetan izena emateko aukera izango dute haur, gazte eta familiek hilaren 14tik 23ra arte. Aukeran, Familia Gunea, Ludotekak eta Gaztelekuak izango dituzte, eta gaur eman dituzte xehetasun guztiak Naroa Zabala Gazteria zinegotziak, Itsaso Cruz Hezkuntza zinegotzia, eta Patricia Arozena Hezkuntza eta Gazteria departamenduko teknikariak.
Programa guztiek hilaren 28an hasiko dute ikasturte berria eta 0-17 urte arteko adin tartea hartuko dute.
Behin programak martxan jarrita familiek aukera izango dute urriaren 31ra arte parte hartzeari uko egiteko, ordainpeko zerbitzuetan dagokien tarifa ordaindu gabe.
Familia Ginea 2021 eta aurten jaiotako haurrei eta haien familiei begirakoa da. astelehenetik ostiralera 10:00etatik 13:00etara eta 17:00etatik 19:00etara, eta larunbatetan 10:00etatik 12:00etara parte hartu ahalko dute betiere aforoa bete arte. Cruzek azaldu du, ikasturte honetan, familien eskaerari erantzunez Familia Guneko espazioa goizeko ordutegian egunero erabiltzeko aukera zabaldu duela udalak. Ezinbestekoa da parte hartzeko aldez aurretik izena ematea telematikoki (klik hemen) edo Zu arreta zerbitzuaren bidez udaletxean edo Aldakoenean.
Izena ematen duten familiek 46,26 euroko kuota ordaindu beharko dute ikasturte osorako helbideratze bidez.
Ludoteka eta Gaztelekuei dagokienean, 2015 eta 2020 urteen artean jaiotakoek, eta 2009 eta 2014 urteen artean jaiotakoei begirakok dira, hurrenez hurren. Udalerrian sei ludoteka daude: Agustinak, Beraun, Erdigunea, Gabierrota, Kaputxinoak eta Markola. Gaztelekuak berriz, bi dira, Beraun eta Gabierrotan. Zabalak azaldu du aurreratu egin dutela Ludoteka eta Gaztelekuetako sarrera ordua ordu erdiz, guraso eta arduradun batzuen eskaerari erantzunez.
Izen emateak telematikoki egin behar dira gazteriaren webgunean (klik hemen) eta izena ematen duten familiek 46,26 euroko urteko kuota ordaindu beharko dute helbideratze bidez. Gaztelekuen zerbitzua doakoa da. Ordutegia berriz, ludoteketan astelehenetik ostiralera 17:00etatik 19:00etara, eta Gaztelekuetan asteazkenetik larunbatera 17:00etatik 20:00etara.
Cruzek eta Zabalak gogora ekarri dute aurten ere errentaren arabera egokitutako tasak izango dituzte zerbitzuek, “erabiltzaileen gaitasun ekonomikora egokitzeko”. Horretarako, izena emateko garaian, gaitasun ekonomikoaren arabera prezio publikoa egokitzeko eskaera egin beharko dute.
Ludoteka, Familia Gune eta Gazteleku berriak izango ditu udalerriak. Horien inguruan ere mintzatu dira udal ordezkariak eta azaldu Olibeteko ekipamendua eraberritzeko eta Familia Gunea eta Ludoteka bertan kokatzeko lanak urte bukaeran bukatzea aurreikusten dutela. Gazteleku berria izango da bestalde, Ondartxoko Mataderoan. Gazteleku berri hori 2027-2028an irekitzea aurreikusi dute.
Joan den ikasturteko datuak ere eman ditu Arozenak. Ludoteketan 250 haur aritu ziren, eta gaztelekuetan, berriz, 159 lagun.
Informazio gehiago behar dutenek 943 44 96 06 telefono zenbakira deitu dezakete edo posta elektronikora idatzi (klik hemen).
