Jabetze Eskolak neguko programa aurkeztu du
Ikasturtea hastearekin batera martxan jarri da Pasaiako Jabetze Eskola. Izen emateak hilaren 14tik 24ra bitartean egin behar dira.
Pasaiako Udaleko Berdintasun sailak prest du Jabetze Eskolaren neguko ikasturteko programa. Izen emateak hilaren 14an (astelehena) irekiko dira, eta hilaren 24a (osteguna) izango da apuntatzeko azken eguna.
Jabetze Eskolaren helburua da emakumeen ahalduntzea eta autonomia sustatzea, norberaren gorputza, emozioak, pentsamendua eta sormena lantzeko guneak eskainiz. Horiek bermatzeko, askotariko prestakuntza eta topaketa proposamenak antolatzen ditu eskolak, emakumeek elkarrekin ikasteko, esperientziak partekatzeko eta beren gaitasunak indartzeko espazioak sortuz.
Neguko programazioak zazpi jarduera berri izango ditu. Horiek euskaraz, gaztelaniaz eta elebitan egingo dira, barruti ezberdinetan. Proposamen horiek ongizate emozionala, pentsamendu kritikoa, sormena, dolua, gorputza eta indar fisikoa, emozioen kudeaketa eta ahalduntze pertsonala jorratuko dituzte.
Jarduera berriak
- Neure buruarekin adiskidetzen. Buruarekin konektatu eta barne mundua esploratuko da.
- Filofeministak: Filosofo errepublikazaleak etxe bila erbestean. Erbesteari buruzko gogoetatik abiatuta, emakume pentsalarien ekarpenak aztertu eta hausnarketarako teknikak landuko dira.
- Sormenezko idazketan hasteko tailerra. Autore ospetsuen lanak adibide hartuz, orri zuriaren beldurra desblokeatu eta idazten irakatsiko da.
- Doluaren tailerra. Dolua egiten ari diren edo bizitzaren garapenean edo zahartzaroan dauden emakumeen baliabideak indartuko dira.
- Umorea, generoa eta emozioak. Emozio biologikoen eta emozio kulturalen inguruan hausnartuko da gorputz ariketen bitartez.
- Indar fisikoa lantzeko saioak. Indarren entrenamenduaren oinarrizko printzipioak ezagutu eta praktikan jarriko dira.
- Arnastu, bibratu eta kantatu. Gorputzaren eta arnasketaren bidez, eta taldean kantatuz, konfiantza sendotuko da, beste espazio batzuetan segurtasunez jarduteko.
Ohiko jarduerak
Berritasunez gain, urte osoko talde eta guneetan parte hartzeko izen ematea ere berriro zabalduko du eskolak:
- Mindfullnessa.
- Munduko emakumeen literatura.
- Zoru pelbikoa.
- Brikolajea eta konponketak-
- Jatorri askotariko emakumeen taldea: kulturarteko gunea.
- Indarkeriarik gabeko espazioa: autolaguntza taldea.
- Ongi zaintzen eta maitatzen ikasteko taldea.
- Emakumeak korrikalari.
- Emakume palistak.
Izen emateak
Izen emateak doakoak eta nahitaezkoak dira, eta haurtzaindegi zerbitzua eskainiko zaio hala behar duenari, aldez aurretik eskatuta. Izena emateko epea hilaren 14tik 24ra bitartean izango da, eta bi modutara egin daiteke: aurrez aurre HAZ bulegoetan eta online udalaren izapide elektronikoen web atalean aurrez betetako inprimakia entregatuta.
