"Lezoko herria eraiki duten" ekitaldien irudi bila hasi dira
1980ko eta 2010eko hamarkaden arteko testigantza grafikoa jaso nahi du udalak, eta horietan izan ziren ekitaldi, jarduera, festa, iniziatiba, pasadizo eta bestelakoen argazki eta bideo bila hasi da.
2007ko maiatzean Zabarre Haserre jaiak izan ziren Lezon, mendekosteetatik aparte, orduko udalarekin izan ziren desadostasunegatik. Jai horien aurkezpenekoa da irudia, 2007ko maiatzekoa.Lorea Muguruza “Gogoan al dituzte Lezoko 24 orduko futbitoko lehen txapelketak? Gazte Olinpiadak? Lezoko irratia? Lezo 800? Trapujaleren lehen urteak? Pisbeko jaiak? Antzerki autogestionatuak? Txokolatadak? Aerobik lehiaketak? Intsumisoak? Musika taldeak?”. Galdera hori egin die Lezoko Udalak lezoarrei. Zertarako? Horiek guztiak izan ziren irudien bila hasi da, 1980-2020 urteen arteko argazki eta bideo bila, 1980ko, 1990ko, 2000ko eta 2010eko hamarkadetakoak zehazki.
Lau hamarkada mamitsuren testigantza grafikoa jaso nahi du udalak, eta horietan izan ziren ekitaldi, jarduera, festa, iniziatiba, pasadizo eta bestelakoen irudi bila hasi da: “Horietako bakoitzak, ekimen handi eta txikiek, Lezoko herria eraiki dute”.
Irudi horien bidez istorioak, gertakariak, uneak, edo Lezo hamarkada horietan ezaugarritu zuen testigantzak jaso nahi dituzte, digitalizatu eta udal artxibategian gordetzeko. Gero, irudi horiek denen erabilerarako geldituko dira, era zaindu, ordenatu eta eskuragarrian. Udal artxiboan gordetzeaz gainera, erakusketa bat ere egingo dute jasotako guztiarekin. Udalak eskertuko du irudi bakoitzaren atzean den istorioa zein den azaltzea.
Baina, nola eman behar dira irudiak? Hemen aukerak:
- Aurrez aurre: hilaren 15, 16, eta 17an, 17:00etatik 20:00etara, Donibane kaleko Kultura Aretoan. Euskarri fisikoan eramango diren argazkiak eskaneatu, digitalizatu eta unean itzuliko dira.
- Whatsapp bidez: jada digitalean diren argazkiak Whatsapp mezu bidez bidal daitezke, 615 01 02 63 zenbakira.
- Posta elektronikoz: irudiak korreo elektronikoz bidaltzeko baliatu esteka honetatik lor daitekeen helbidea.
