Motor hotsek Jaizkibel hartuko dute
Hilaren 19an eta 20an Jaizkibelgo Igoeraren 48. edizioa jokatuko da. Lasterketak hilaren 20an izango dira, 08:30etik aurrera.
Datorren igandean (hilaren 20an) Escuderia Jaizkibelek RAC Vasco Navarroren laguntzarekin antolatzen duen Jaizkibelgo Igoeraren 48. edizioa jokatuko da. Lasterketak, 5,5 kilometroko luzera du eta GI-3440 errepidean lehiatuko da, Lezo, Hondarribia eta Jaizkibelgo gaina lotzen dituen bidean. Jaizkibelgo proba Euskal Herriko eta Gipuzkoako mendiko txapelketetarako puntuagarria da.
Autoen motorrak hilaren 20ko 08:30ean jarriko dira martxan, entrenamenduekin. Prestaketen ondoren jokatuko da lasterketa. Sari banaketa ekitaldia proba guztiak bukatu ondoren egingo da, Pasaiako portuan, 15:30ean. Hilaren 19ko arratsaldean, baina, auto parte hartzaileak ikusi ahal izango dira Errenteria-Oreretako Touring pasealekuan, bertan egingo baitituzte ibilgailuen egiaztapen teknikoak.
Jaizkibelgo probak 65 parte hartzailerentzako lekua du gehienez. Izen emateak gaurko (ostirala, hilaren 11) 20:00etan itxiko dira, eta Euskadiko Federazioaren webgunearen bidez egin behar dira. Parte hartzaileak Arkaitz Ordoki eta Bruno Scherer pilotuen lekukoa hartzen ahaleginduko dira, haiek izan baitziren iazko garaileak.
