Kirol orientazio zerbitzua, martxan
Errenteriako Udalak Jarduera Fisikorako Orientazio Zerbitzuaren denboraldi berria martxan jarri du, herritar guztiei zuzendua, eta bereziki jarduera fisiko gutxi egiten dutenei begira.
kontuan hartuta jarduera fisikoa erregulartasunez egiteak hainbat onura dakartzala, eta eraginkorra dela hainbat gaixotasuni aurre egiteko.
Zerbitzuaren helburua da eguneroko bizitzan jarduera fisikoaren ohiturak txertatzen laguntzea. Zenbait herritarrek beste batzuek baino errazagoa dute kirola edo ariketa fisikoa egitea: proiektu honek, bereziki, zailtasunak dituzten herritarrei lagundu nahi die. Horretarako, orientatzaile batek erabiltzaileari bere aukeretara, beharretara eta lehentasunetara ondoen egokitzen den jarduera fisikoko programa bat proposatuko dio, eta elkarrekin ezarritako helburuen betetze-mailaren jarraipena egingo dute. Leire Juanbeltz kirol orientatzaileak gidatuko du programa. Herrian zein eskualdean kirola egiteko dauden aukera guztien berri du orientatzaileak, eta horrek erraztuko du erabiltzaile bakoitzari ondoen datorkion kirola zein den esan ahal izatea.
Zerbitzuak pertsona bakoitzaren abiapuntua ezagutzeko jarduera fisikoaren mailaren eta ohituren balorazioa egingo du. besteak beste, elikadura, lan bizitza, gizarte bizitza, eta jarduera fisikoaren historia hartzen ditu kontuan. Hala eskatzen dutenek gainera, programa pertsonalizatu bat jasoko dute, jarduera fisikoari buruzko fitxa baten bidez. Bertan egin beharreko jarduerak, maiztasuna, iraupena eta intentsitatea zehaztuko ditu orientatzaileak, baita jarduera osagarriak eta kontuan hartu beharreko bestelako gomendioak ere.
Herritarrentzako doako zerbitzua, aldez aurretiko hitzorduarekin
Hitzordua eska daiteke 670 107 455 telefonoan edo emailean.
Galtzarabordako kiroldegian, goiko sarreratik sartu eta eskuinaldean du bulegoa orientatzaileak.
Behin-behinean, zerbitzua ordutegi honetan emango da: Astelehena: 14:00etatik 18:00etara Galtzarabordako kiroldegian; Asteartea: 09:00etatik 11:00etara, eta 14:00etatik 18:00etara Galtzarabordako kiroldegian, eta 11:00etatik 13:00etara Beraungo anbulatorioan; Osteguna: 09:00etatik 13:00etara eta 14:00etatik 16:00etara Galtzarabordako kiroldegian, eta 16:00etatik 18:00etara Iztietako anbulatorioan; eta ostirala: 9:00etatik 13:00etara.
