Azken egunak Pasaiako Udal Euskaltegian izena emateko
Zentroko arduradunek adierazi dute matrikulazio epea azken txanpan sartu dela. Eskolak hilaren 24an hasiko dira.
Pasaiako Udal Euskaltegiak mezu bat helarazi die euskara ikasi edo hobetu nahi duten horiei: 2026-2027 ikasturteko izen emateak azken egunetan sartu dira. Euskara pauso batera lelopean, zentroak baliabide guztiak jarriko ditu “euskara modu eroso eta malguan” ikasteko eta ikasleek haientzako egokiena den taldea aurkitzeko. Eskolak hilaren 24an (osteguna) hasiko dira.
Udal Euskaltegiak A1etik C1era bitarteko mailak eskaintzen ditu, ordutegi zabalean (07:00etatik 21:00etara bitartean). Horiez gain, langabetuentzako ikastaro trinkoak ere eskuragarri ditu. Talde batzuetan leku libre batzuk daudela baietsi dute arduradunek.
Ikasturteko programa gelako ohiko ikaskuntzara edo titulu ofizialak (HABE, IRALE edo IVAP) egiaztatzera mugatuko ez dela jakinarazi dute arduradunek. “Ikasleak motibatzeko eta euskara egoera errealetan erabiltzeko”, ikasturtean zehar hainbat jarduera antolatzen dituzte: tailerrak, kultura irteerak eta txangoak, interes orokorreko hitzaldiak edota Mintzalaguna egitasmoa.
Udalak “oso prezio eskuragarriak” eskaintzen dituela gogorarazi dute arduradunek, batez ere gazteentzat (16-30 urte), langabetuentzat eta hasierako mailetan matrikulatzen direnentzat. Horrez gain, pasaitarrek ikasturtea bukatzean ordaindutako matrikularen %100 berreskuratzeko aukera izango dute.
Informazio gehiagorako, 943 00 43 40 telefonoa ahalbidetu dute. Udal Euskaltegira ere zuzenean gerturatzeko aukera izango du ahala nahi duenak. Zentroa Trintxerpeko Euskadi etorbideko 61. zenbakian dago kokatuta, anbulatoriora joateko igogailuaren ondoan.
