Olibet-Etxeberrietako aparkaleku berriaren lanak, martxan
69 plaza berri eskainiko ditu Olibet-Etxeberrietako aparkaleku berriak, eta sei hilabeteko iraupena izango dute lanek.
Olibet-Etxeberriak aparkaleku berrian lanak hasi dituzte.Herri Bizia Udalak hasi ditu Olibet-Etxeberrietako aparkaleku berria eraikitzeko lanak. Renferen tren geltoki ondoan kokatuta, 69 plaza berri eskainiko ditu eta 1.100.000 euroko aurrekontua izango du. Plazetako bik, auto elektrikoak kargatzeko gailuak izango dituzte, eta beste bi, mugikortasun urriko pertsonentzat erreserbatuta egongo dira. Gainera, motoentzako aparkalekua, eta bizikletentzako aparkaleku estalia ere izango ditu azpiegitura berriak. Lanek, berriz, sei hilabete iraungo dute.
Aparkatzeko plazak sortzearekin batera, proiektuak ingurunea hobetzeko beste jarduketa batzuk jasotzen dituela azaldu du udalak, “·besteak beste, aparkalekua Zubiaurre kalearekin lotzeko oinezkoentzako konexio berri eta segurua egingo da”.
Azken hilabeteetan aparkalekua eraikiko den lursaila garbitu eta prestatzeko beharrezko lanak egin ditu udalak. Era berean, lanen hasiera, ADIF hirugarren trenbidea eraikitzeko egiten ari den jarduketekin koordinatu dela azaldu du udalak, bi jarduketak bateragarri egiteko.
ADIFen lurretan egingo da jarduketa, bi aldeen artean lortutako akordioari esker. Lur eremuaz gainera, akordio horren barruan, 1.000.000 euroko ekarpena jasoko du udalak, obrak finantzatzeko.
Lanek eragina izango dute inguruan eta hori horrela, udalak azaldu du neurriak hartu dituela auzoaren egunerokoan ahalik eta afekziorik txikiena eragiteko. Batetik, faseka antolatu ditu lanak; bestetik, materialak, makinak eta obrako etxolak pilatzeko eta kokatzeko eremuak ahalik eta gehien mugatu dira, okupatutako azalera ahalik eta gehien murrizteko.
Aparkaleku berriak inguruan bizi direnei aparkamendua erraztuko die, baina gainera, geltokiaren inguruan aparkatzeko aukerak hobetuko dituela nabarmendu du udalak, trenaren bidezko garraioaren erabilera erraztuz.
Olibet-Etxeberriak auzoan eraikiko diren 69 plaza berriekin, 350 aparkaleku plaza izango dira agintaldian zehar udalak herriko eremu ezberdinetan gaitu dituen aparkaleku plaza berriak.
