Energia komunitatea izango du Pasaiak
Herritar talde batek komunitatea abiatzeko lehen urratsa egin du jada. Lehen lan saioa ostegunean (hilaren 24an) izango da, 18:30ean, Antxon.
Pasaiako Udalak energia komunitate bat sortzeko prozesua abiatuko du, “herritarrekin batera tokiko energia eredu bidezkoago, parte hartzaileago eta jasangarriago baten alde aurrera egiteko”. Prozesua lehen urratsak egiten ari dela jakinarazi du udalak, herritar talde bat komunitatea gauzatzeko prest azaldu baita.
Udalaren arabera, prozesuaren helburua da “herritarrak energia sistemaren erdigunean jartzea, energia berriztagarriaren sorkuntza eta kontsumo partekatua sustatuz eta, aldi berean, energia kontsumoaren kostua murrizteko eta energia pobreziari aurre egiteko tresnak garatuz”.
Udalak hiru dinamizazio saio egin zituen otsailean eta martxoan herritarrekin, energia komunitateen ezaugarriak eta aukerak ezagutzeko, finantzaketa eta proiektu posibleak aztertzeko eta komunitate bat nola sortu eta kudeatu daitekeen lantzeko. Azken saioan, martxoaren 26an, 15 pertsonako lan talde bat Pasaiako energia komunitatea sortzeko prozesua abiatzeko prest azaldu zen.
Hurrengo fasean, udalak aholkularitza tekniko espezializatuaren laguntza eskainiko du, eta herritarrekin batera hainbat lan saio egingo dira. Lehen saioan bertan parte hartzen dutenen artean zehaztuko da prozesuaren ibilbide orria eta hurrengo saioen ordutegia, parte hartzaileen behar eta proposamenetara egokituta.
Aurreikusitako lan ildoen artean honakoak daudela zehaztu du udalak: energia komunitatearen oinarrizko alderdi teknikoak ezagutzea, beste energia komunitate batzuen esperientziak partekatzea, komunitateak izango duen forma juridikoa erabakitzea, haren izena eta irudia definitzea eta haren egitura eta gobernantza eredua zehaztea. Prozesuaren bukaeran, energia komunitatea herritar guztiei aurkezteko saio ireki bat egitea aurreikusi dutela aurreratu du udal erakundeak.
Honakoa adierazi du Iraitz Pazos Ingurumen zinegotziak: “Energia komunitate bat sortzea ez da soilik energia berriztagarria ekoizteko proiektu bat abiatzea. Energia ereduaren inguruko erabakiak herritarrengana hurbiltzeko eta komunitatean bertan antolatzeko aukera ere bada”. Bide horretan, Pasaian trantsizio energetikoaren aldeko urratsak egiteko konpromisoa berretsi du udalak: “Horregatik, energia komunitate hau herritarrekin batera eraiki nahi dugu, hasieratik. Haiek erabakiko dute zer egin nahi duten, nola antolatu nahi duten eta zer proiektu bultzatu nahi dituzten”.
Pazosek, gainera, energia komunitate batek izan dezakeen eragin sozialean ere jarri du arreta: “Energia berriztagarria sortzeaz gain, autokontsumo partekatua bultzatzeko, energia kontsumoaren kostua murrizteko eta energia pobreziari aurre egiteko aukera ematen dute. Energia garbiagoa izateaz gain, energia eredu bidezkoago baten alde egiteko tresna ere bada”.
Lehen lan saioa ostegunean (hilaren 24an) izango da, 18:30ean, Antxoko Kultur Etxean. Lehen saioan hurrengo hitzorduen egutegia eta prozesuaren ibilbide orri orokorra zehaztuko dira.
