Ikastaro eta hitzaldi aro berria Gaztañon
Sei tailer eta sorkuntza espazio bat izango ditu martxan gaztañoko auzo lokalak ikasturte berrian. Lehen hitzaldian etxekoak izango dituzte protagonista, 1990ean egindako Euskal Herria-Txina bizikleta bidaiaren kontaketa egiteko.
Gaztañoko auzo lokalaGaztaño auzo elkartea Ikastaro eta hitzaldietan udan zehar etenaldia eginda, indar berrituta dator ikasturte berrian eskaintza zabala egiteko asmoz Gaztañoko auzo lokala. Ikastaroetan izen ematea zabalik du, eta denera sei tailer eta sorkuntza espazio bat izango ditu aukeran. Lur artean yoga tailerraren barruan Hatha Vinyasa klaseak martxan dira dagoeneko, astelehenetan 16:30etik 17:45era eta 20:00etatik 21:15era; eta ostegunetan, 20:00etatik 21:15era.
Taichi Chuan tailerra hilaren 28an jarriko dute martxan eta astelehenetan egingo dituzte saioak 18:00etatik 19:45era. Egun bat geroago, hilaren 29an hasiko da Dantza askea. Jakitunen dantza. Hemen eta orain tailerra. Astearteetan izango dira eskolak, goizez eta arratsaldez, 10:30etik 13:00etara eta 17:00etatik 19:30era.
Arrakastatsua da soinu, triki eta pandero tailerra; hilaren 30ean hasiko da hori eta eskolak asteazkenetan izango dira 15:30ean hasi eta 20:30era arte. Euskal dantza tailerra, berriz, urriaren 5ean jarriko dute martxan, astelehenetan 10:30etiok 11:30era; asteazkenetan 10:00etatik 11:00etara; eta ostegunetan 10:30etik 11:30era eta 12:30etik 13:30era.
Seigarren tailerra, Biodantzarena urriaren 1ean hasiko da eta eskolak, ostegunetan izango dira 17:00etatik 18:30era.
Abakok, berriz, sorkuntzari ateak zabalduko dizkio: “Abakok Gaztañoko sormen josketa tailerra komunitateari zabaldu dio, doako espazio bat sortzeko, jakintzak partekatzeko, eta josten dugun bitartean elkar zaintzeko, garai baten gure auzoetan hain ohikoak ziren josketaren inguruko topaketak berreskuratzeko. Finean, ez da hainbeste zer josten duzun, josten duzun bitartean gertatzen dena baizik”.
Abakok bost urte daramatza Gatzañoko espazio komunitarioaren parte izaten eta bertan du bere sormen josketa tailerra, makinaz, tresnaz oihalez, hariz eta berrerabiltzeko material ugariz hornitutako espazioa. Orain arte elkartearen tailer eta sorkuntza espazio gisa erabili izan dute, “ikasturte honetan baina, ateak pixka bat gehiago zabaldu nahi dizkiogu komunitateari. Ez akademia edo josketa ikastaro gisa, libreki josi, konpondu edota materialak berrerabiltzeko edo konpainian tarte atsegin bat pasatzeko espazio gisa”.
Hori horrela, lehen bisita aurrez adostuta egingo dute, eta ez da beharrezkoa auzoan bizitzea, ezta josten jakitea ere, “espazioa gerturatu nahi duen ororentzat dago zabalik. Haurren kasuan, pertsona heldu arduradun batekin bertaratu beharko dira”.
Erronka kolektibo berria ere jarri du martxan Abakok ikasturte berrirako: Maritxuren jantzi berria pentsatu eta jostea auzoko jaietarako. Izan ere urteroko ohiturari jarraituz, jaietako gaiaren inguruko jantzia izaten du eta Maritxuk. Abakok beraz, espazioa, makinak, tresnak eta materialak jarriko ditu, “komunitateak jarriko ditu ideiak, jakintza, eta barruan sortuko den bizitza”.
Tailerretan parte hartzea zabalik dago auzotarrentzat zein auzotik kanpokoentzat ere. Izena eman nahi dutenek tailerren ordutegian auzo lokalera jo eta tailerraren arduradunekin hitz egin behar dute.
Lehen hitzaldia, etxekoekin
Ikastaroekin batera, hitzaldi ziklo berriari ere ekingo dio Gaztañoko auzo lokalak. Programazioaren lehenengoa, ostiralean izango da (hilaren 25ean) 19:00etan eta protagonistak gertu gertukoak izango dira, auzokideak. Euskal Herria-Txina bizikletaz 1990 izenburupean hitzaldia eskainiko dute bidaian parte hartu zuten lau kideetako bik, Ina Rufo Astinzak eta Iñaki Arrieta LLopisek. Biak Euskadi-Txina 15.000 kilometro ekialderantz (joan-etorrian) abenturaren parte izan ziren duela 36 urte.
Bidaiaren gainekoak, bizi izan zituztenak, lehen eskutik kontatuko dituzte bi auzotarrek, baita argazki proiekzioa eskaini ere bidaian egindako irudiekin.
Hori izango da lehena, interesgarria ziur, Gaztañoko auzo elkarteak antolatzen dituen hitzaldi denak bezala. momentuz abendura arteko guztiak lotuta dituela jakinarazi du, eta hilabeteka joango da aletzen.
Udako oporretan etenaldia bai, baina hala ere, Gaztañoko auzo elkarteak hainbat jarduera antolatu ditu: “besteak beste Kubaren alde dirua eta botikak biltzeko kanpaina, edota Venezuelako lurrikararen ondorioak aritzeko diru bilketa ere. Eskerrak eman nahi dizkiegu bi horietan lagundu duten pertsonei. REAS elkarteak ere bazkideen batzarra auzo lokalean egin zuen… Auzolanean, eta sareak josten aritzen gara, herrien arteko elkartasunarekin sinistuta, internazionalismoa, azuolana, eta autogestioa oinarri. Horietatik abiatuta antolatzen ditugu auzoan egiten direnak”.
Hori nabarmen jarrita, auzotarrei deia, “proposamenen bat dutenek auzo elkartearekin harremanetan jar daitezke”. Herritarrei orohar ere gonbidapena, “auzo lokalera gerturatu eta antolatzen ditugunetan parte har dezaten”.
