"Osasuna behar dugu, portu zikinik ez" esateko argazki erraldoia
Badiaren inguruan bizi direnen argazki erraldoia egiteko deialdia egin dute Lezotik. Ostegunean (hilaren 24an) egingo dute, 19:00etan eta Lezoko plazan.
Abuztuaren 21eko portuko suteak eragindako kezka, haserre eta ezinegonaren oihartzunak indarrean darrai. Lezon herritarrak antolatu dira, eta osasunaren aldeko nahiz portuak sortzen duen kutsaduraren kontrako mugimendua gorpuztu dute. Gaiak, ordea, badiaren inguruan bizi diren denei eragiten diela azaldu dute herri ekimenez sortu den mugimenduko kideek, eta horregatik portuaren inguruan bizi diren herritar guztiei zabalik den deialdia egin dute hilaren 24rako (ostegunerako), 19:00etan, Gurutze Santuaren plazan. “Osasuna behar dugu, portu zikinik ez” irudi jendetsu bidez esateko argazki erraldoia aterako dute.
Eskaera horri eusteko ahalik eta jende gehiagoren presentzia eskatu dute deitzaileek, “etorri eta animatu ingurukoak”.
Osteguneko deialdiaz gainera, urriaren 3rako (larunbata da) manifestazioa deitu dute Lezon, 17:00etan plazatik hasita.
