Bonu kanpainaren zortzigarrena, prest
Urriaren 1ean jarriko dute martxan herriko merkataritza, ostalaritza eta zerbitzuen sektorea sustatu eta herritarren kontsumoa tokiko establezimenduetara bideratzeko.
Bizi Errenteria Bonu Kanpaina martxan jarriko du udalak, zortzigarrenez. Bonu kanpainaren zortzigarrena egingo du udalak. Urriaren 1ean abiatuko dute Hurbileko Salmenta Kanala Indartzeko bonu kanpaina herriko merkataritza, ostalaritza eta zerbitzuen sektorea sustatu eta herritarren kontsumoa tokiko establezimenduetara bideratzeko. Bonu horiek azaroaren 30era arte izango dira indarrean, kanpainarekin bat egiten duten establezimenduetan. Gaur aurkeztu dute kanpaina berria Aizpea Otaegi alkateak, Leire Mazizior (EH Bildu), Maite Gartzia (Elkarrekin Errenteria), Elixabete Murua (EAJ), Antonio Vicente (PP) zinegotziek, Errenkoaldeko presidente Maika Martinek, elkarteko ordezkari Mikel Salaberriak, eta Gema Retegi, eta Mabel Cuña merkatariak lagunduta.
Gaurko agerraldiaz gain, eskuorri informatiboak banatzen ari dira etxebizitza guztietan kanpainaren berri herritar guztiei emateko.
“Aurreko aldietan bezala udalerriaren bizigarritasuna sutatzea, gure ehun ekonomikoak sekulako garrantzia dauka eta bonuen bidez, herritarren eta gure establezimenduen arteko harremana estutzea da helburua”, adierazi du Otaegik. Bonuek tokiko ekonomia indartzeko balio dute, baina baita familiei ere “neurri batean” laguntzeko Otaegiren hitzetan, “azkenean, herrian erroldatutako pertsona guztiek bonuetarako aukera izango dutelako”.
Gazteenei keinu; 18 eta 35 urte bitarteko gazteek hiru bonu izango dituzte eskura. Erabaki horren arrazoia azaldu du alkateak: “Helburua da bereziki gazteenen eta gure ehun ekonomikoaren arteko harremana estutzea eta erosketa ohitura herrian finkatzea”. 35 urtetik gorakoentzat kanpaina honetan 5 euroko bi bonu, hamar euro denera nonahi gastatzeko.
Berritasunak sisteman
Sistemari dagokionean hainbat aldaketa egiten joan da urtez urte udala eta aurten ere ezberdina izango da. Herritarrek ez dute bonurik jasoko, ezta aplikazioan deskargatu beharko ere. Nahikoa izango da kanpainan parte hartzen ari den komertziora joan, nortasun agiriko datuak merkatariari eman eta bonuak erabili nahi dituela esatea, “lehentasunetako bat izan da herritarren esperientzia erraztea eta ahalik eta gehien sinplifikatzea”.
Kanpainaren eraginkortasuna areagotzeko ezinbestekoa jo du udal agintariak ahalik eta herriko eragile ekonomiko gehienek parte hartzea; horren harira, beraz, deia Otaegik oraindik ere kanpainara atxiki ez diren establezimenduak bat egin dezaten.
Erronka ere jarri die Otaegik herritarrei eta merkatariei. 2024. urtekoa izan zen kanpainarik garrantzitsuena, bonu gehien orduan erabili zituztelako herritarrek, %69, zehazki. Kopuru hori berdintzea edota gainditzea jarri du helburu Otaegik aurten, “helburua %70eko erabilerara heltzea da”. Denera 54.177 bonu jarriko ditu udalak zirkulazioan, “hau da, potentzial osoaren %70 inguru. Erabakiaren helburua ez da herritarrei aukera gutxiago eskaintzea, baliabide publikoak modu eraginkorragoan erabiltzea baizik, eta bonuen benetako erabilera handitzea”. Bonu kopurua mugatzeak herritarren parte hartzea eta bonuak garaiz erabiltzea sustatu nahi duela gaineratu du alkateak.
Helburua, argia, bonu ahalik eta gehien erabiltzea, eta erabilera horrek Errenteria-Oreretako establezimenduetan benetako kontsumoa sortzea, “ia 300.000 euroko udal ekarpenaren bidez, gutxienez 600.000 euroko kontsumo bolumena sortzea aurreikusten da, inbertsio publikoaren eragina tokiko ekonomian biderkatzea”.
Dinamizaziorako, positiboa
Maika Martin Errenkoaldeko presidenteak kanpaina positiboa dela esan du, “merkataritzaren dinamizaziorako oso garrantzitsua da kanpaina, are gehiago une honetan, eskolara itzulera eta hainbat gastu dituztelako familiek”. Kanpaina egiteko datak ez direla ausaz aukeratzen jarri du nabarmen, “kontsumoak hainbat sektoretan behera egiten du, eta halako kanpainak garrantzitsuak dira oso, kontsumoa herrian egiteko”. Eskertuta azaldu da kanpainaren aukera izateagatik. Sisteman egindako aldaketarekin ere aldeko azaldu da Errenkoaldekoa, “urtez urte ikasten ari gara eta hobetzen doa”. Deia herritarrei, “ahalik eta bonu gehien erabiltzea da helburua”.
