Elkartasunarentzat leiho
Juneren Hegoak elkarteak bere izena duen eguna ospatuko du urriaren 3an. Eguerdira arteko jarduerak, elkarteak egiten duen lana ikusarazi, sentsibilizatu eta lanean jarraitzeko baliabideak eskuratzea du helburu.
Juneren Hegoak Egunaren aurkezpena.Juneren Hegoak Elkartea Juneren Hegoak elkarteak bere egun handia ospatuko du urriaren 3an, larunbatarekin. Aurten, goizetik eguerdira arteko egitaraua ondu dute Juneren Hegoak Egunari begira, elkarteak egiten duen lana zabaldu eta jakinarazteko, baita familiekin egiten duten lanketarako ezinbesteko dituzten bitartekoak lortzeko ere. Goizean zehar hainbat ekintza egingo dira Gernika plazan ; eguraldi txarra izanez gero, Koldo Mitxelenaren patiora lekualdatuko dituzte.Beste elkarte batzuen lana ere zabaltzeko baliatuko dute hitzordua. Hala, Abarka, Mindara, Pausoka eta Quitemos hierro a Uxue (BPN) elkarteen gaineko informazio emango du ekitaldia gidatuko duen Allende Urritegi Juneren Hegoak elkartearen laguntzaile gazteak.
Puzgarriak, eskulanak, aurpegi margoketa, bubble ball-ak eta mahai-tenisa izango dira, baita photocall bat eta jaiari bukaera emango dion ponpa-festa ere. Bestalde, ekitaldian parte hartuko duten elkarteen produktu solidarioak erosi ahal izango dira; 2027ko egutegia prest du Juneren Hegoak elkarteak, eta salgai izango da urriaren 3ko topaketa horretan.
Herritarrei gerturatzeko deia egin die Juneren Hegoak elkarteak, “antolatutako jarduerez eta Gernika plazan egongo den festa giroaz gozatzeko”. Elkarteak jardunaldiaren bidez eguneroko lana ikusarazi, haurren gaixotasun bat bizi duten familiek bizi duten egoerari eta horrek egunerokoan duen eraginari buruz sentsibilizatu, eta boluntarioen lanari aitortza egin nahi die, “haien ekarpenik gabe ezinezkoa izango bailitzateke elkartearen lana aurrera eramatea”.
Juneren Hegoak 2013an sortu zen, eta laguntza sare bat da gaixotasunak, dibertsitate funtzionaleko egoerak edo-eta adingabeen dolua bizitzen ari diren ahultasun-egoeran dauden Gipuzkoako familientzat. Babes eta laguntza ezinbestekoa eskaintzen die elkarteak familia horiei.
Juneren Hegoak elkartea lagundu nahi dutenek hauetako bideren bat erabil dezakete: Boluntario egin nahi dutenei, posta elektroniko helbide honetara idazteko eskatu diete; hilero euro baten trukez Teamer izateko berriz, hemen sakatu. Dohaintza egiteko aukera ere badago (horretarako klik egin hemen). Juneren Hegoak elkartearen laguntzaile izateko aukera ere eskaintzen du elkarteak.
Horretaz gain, Sabadell banketxeko ES81 0081 4254 46 0001112822 kontu korrontean egin daiteke ekarpena, baita Bizum bidez ere 03930 kodea erabilita, edota dohaintzak sailean Juneren Hegoak bilatuta.
