'Loturak askatzera!' lelopean, Txiki eta Otaegi gogoan Lezon
Hilaren 27an ekitaldia egingo du Sortuk Karlos Saldise plazan. Bezperan, solasaldia eta kontzertua Donibaneko Kultur Aterpean.
Karlos Saldiseren oroitarriaren parean izango da ekitaldia. Hilaren 27an beteko dira 51 urte erregimen frankistak Juan Paredes Manot Txiki eta Angel Otaegi Etxeberria fusilatuta exekutatu zituenetik. Horren harira, Sortuk oroitzapen ekitaldiak antolatu ditu Euskal Herriko 50 herri baino gehiagotan. Lezon ere aitortza egingo diete Txiki eta Otaegiri, hilaren 27an bertan (igandean): Loturak askatzera! lelopean, ekitaldia egingo du Karlos Saldise plazan, Saldiseren oroitarriaren parean, 12:00etan. Horrekin lotura, eta Donibaneko Bixi-Bixi elkartearekin elkarlanean solasaldia eta musika saioa izango dira Donibaneko Kultur Aterpean bezperan (hilaren 26an), 19:00etan hasita.
Igandeko ekitaldia testuinguruan jarri du Sortuk. “Irailaren 27a Txiki eta Otaegi oroitzeko eguna da Nazio Askapen Mugimenduarentzat. Baina, memoriarako eguna izateaz gain, askapen borrokan berresteko, eta etorkizunera begiratzeko eguna” ere badela azpimarratu dute: “Urtero oroimenez eta aldarrikapenez bete eta harrotasunez bizi dugu egun hau. Eta arian-arian, Nazio Askapen Mugimenduaren eguna bilakatzen ari da», azaldu dute. Txiki eta Otaegiren fusilamenduen urteurrena hainbat kide eta belaunaldi elkartzen dituen eguna da Sorturentzat «Euskal Herriaren alde borrokan ari zen, ari den eta haren askatasuna lortu arte borrokan ariko den komunitatea izateak batzen gaitu irailaren 27an. Nazio Askapen Mugimendua zerbait bada borroka komunitate bat delako», berretsi dute.
“Askapen prozesua” une erabakigarrian dagoela uste du Sortuk, “1978ko erregimenean lotuta geratu ziren korapiloak” askatzeko aukerak daudela uste duelako: “Euskal Herrian potentzial politiko izugarria daukan fase politikoa zabaltzea lortu dugu. Eta orain askapen prozesuan egoera berrietan murgiltzeko baldintzak ereitea dagokigu”.
Urtero, hilaren 27arekin lotutako Txiki eta Otaegiren aitortza ekitaldiak irudikatzeko euskarriak artista batek egiten ditu. Aurtengoa Mikel Erkiaga bilbotarrak egin du. Lezoz aparte, igandean Oarso Bidasoko herrietan beste hainbat herrietan egingo dira ekitaldiak, Oiartzunen, Errenteria-Oreretan eta Hendaian (Bidasoko deialdia da) kasu.
Igandeko Karlos Saldiseko ekitaldiaren aurretik, larunbatean, Donibaneko Kultur Aterpean Herria askatzen katea eten? izenburuko solasaldia izango da Kizkitza Gil de San Vicenteren eta Aitzol Gil de San Vicenteren eskutik. Ondoren, Patxi Sainz abeslariak Kantatzen duen herria gara emanaldia eskainiko du.
Hitzorduak
Hilak 26, larunbata
- 19:00etan, Donibaneko Kultur Aterpean, Herria askatzen katea eten? izenburuko solasaldia Kizkitza Gil de San Vicenteren eta Aitzol Gil de San Vicenteren eskutik. Ondoren, Patxi Sainz abeslariak Kantatzen duen herria gara emanaldia eskainiko du.
Hilak 27, igandea
- 12:00etan, Karlos Saldise plazan, Loturak askatzera! lelopeko ekitaldia.
