Torreatzerekin, energia berriztagarri eta burujabe gehiago Lezon
Kunkanak Torreatzeko gunean jada jarrita ditu eguzki plakak. Horien energia baliatzeko aukera dute bazkide erabiltzaileek.
Torreatzeko instalazioaren irudia.Kunkana Kunkana Lezoko Energia Komunitatea urrats sendoak ematen ari da energia berriztagarriak sortu eta horren bitartez energia burujabetzaren bideari eusteko. Pasaia-Lezo Lizeoko eguzki plaken instalazioa abian da, eta orain, Torreatzekoa (Gaintxurizketako pabiloi batean dago) prest dute. Han sortuko den energiaren erabiltzaile bila ari dira orain. Kunkanaren bazkide erabiltzaile izan behar da derrigor bai Lizeoko zein Torreatzeko iturrietatik sortutako energia jasotzeko.
Kunkanakoek zehaztu dute urrian zehar izango dela aukera Torreatzeko instalazioko energia jaso nahi dela adierazteko. Hala, haien webgunearen bitartez eman dezakete bazkideek izena; han bazkide egiteko aukera ere dago. Izena eman ondoren, energia komunitateko kideek harremana egingo dute eskatzaileekin elektrizitate faktura eskatu, eta kontsumo gaitasuna aztertzeko.
Azalpen gehiago eman dituzte Kunkanaren gidariek. Zalantza bat argitu dute: Torreatzeko energia jasotzeko ez da etxean inolako obrarik egin behar. Instalazioa Gaintxurizketan dagoen arren, bost kilometro arteko eremuan diren erabiltzaileek egun duten elektrizitate kontratua eta kontagailua balia ditzakete autokontsumoa era errazean aktibatzeko.
“Torreatze proiektuarekin”, esan dute, “Kunkanaren helburua da Lezon bertan energia berriztagarria sortzea eta energia komunitatearen bidez herritarren esku jartzea, tokiko ekonomia eta energia-burujabetza sustatuz”.
