Portuko soinu inpaktua simulatu eta ebaluatzea xede
Tecnalia zentro teknologikoak Pasaiako portuko operazioek eragindako soinu inpaktua simulatu eta ebaluatzeko sistema berritzaile bat garatuko du, hiru fasetan.
default Tecnalia zentro teknologikoak Pasaiako portuko operazioek eragindako soinu inpaktua simulatu eta ebaluatzeko sistema berritzaile bat garatuko du. Proiektuak 55.000 euroko aurrekontua eta 15 hilabeteko gauzatze epea dituela jakinarazi du Pasaiako Portu Agintaritzak (PPA). Tecnaliak portuko azpiegituraren mapa akustikoa zehaztasunez diagnostikatu eta ingurunearen jasangarritasuna indartuko du.
Diagnostikoaren ardatz nagusia portuko zarata maparen hiru dimentsioko biki digital bat sortzea izango dela adierazi du PPAk, soinuaren hedapena modu birtualean birsortzeko. “Tresna honekin eta tokian bertan egindako neurketekin, zarata emisioak xehetasunez karakterizatuko ditugu, aurrea hartu eta erabakiak hartzeko prozesua optimizatzeko”, baietsi du Izaskun Goñi PPAko presidenteak.
Portu esparrua Pasaiatik, Errenteria-Oreretatik eta Lezotik gertu dagoenez, azterlanak soinu foku nagusiak kokatzeko, haien irismena ebaluatzeko eta etorkizuneko arintze neurriak oinarritzeko aukera emango duela aurreratu du PPAk. “Horrela, portuak eredu dinamiko bat izango du herritarrei eragozpenak prebenitzeko eta jardueraren hazkundea hiri ingurunearen kalitatearekin uztartzeko”.
Hiru fasetan
Tecnaliako espezialista taldeak hiru fasetan gauzatuko du portuko proiektua. Lehenik, portuaren funtzionamenduari, operazio motei, jarduera estatistikei eta kontsulta edo kexen erregistroei buruzko informazioa aztertuko dute, zarata sortzeko potentzial handiena duten fokuak identifikatzeko.
Ondoren, Tecnaliako adituek tokian bertako soinu neurketa kanpainak egingo dituzte, eta 3D eredu digital bat prestatuko dute, soinua portu esparru osoan eta ingurune hurbilean nola hedatzen den simulatzeko.
Azkenik, ikertzaileek emaitzak ebaluatuko dituzte eta portuaren operatibara bideratutako arintze neurri praktikoen gomendio proposamen bat egingo dute.
