Urriaren 17a gozo-gozoa izango da Lezon
Lezoko kaleak tokiko merkataritzaren, artisau gozogintzaren eta auzo bizitzaren topaleku bilakatuko ditu Auzoaren Arima Gozoa azokak.
Ezinbestekoa da tokiko merkataritza herriak eta auzoak bizirik mantentzeko, eta ekuazio horren parte dira ere ostalaritza, artisauak eta herritarren arteko harremanak. Horren jakitun, Auzoaren Arima Gozoa azoka ondu dute Gozoa Euskadiko gozogileen elkarteak, Lezoko Udalak eta Auzoaren Arima iniziatibak elkarlanean Oarsoaldea Garapen agentziaren bidez.
Urriaren 17an izango da hori, larunbatarekin; Lezoko kaleak tokiko merkataritzaren, artisau gozogintzaren eta auzo bizitzaren topagune bihurtuko ditu azokak. Gainera, Elkar Zainduz kanpainaren balioak kalera eramango dituela azaldu dute antolatzaileek: “Tokikoa zaindu, elkar zaindu eta herri bizi bat eraikitzen jarraitu”. Azoka horretan Salva enpresak ere parte hartuko duela jakinarazi dute.
Lezoko erdigunea hainbat gunetan banatuko dute: tokiko merkatuaren gunea, artisau gozogintzaren gunea eta herritarrak elkartu eta produktuen inguruan esperientziak partekatzeko topagunea: “Helburua ez da produktu bat saltzea, kaleak elkargune bihurtzea, bertako merkataritzari balioa ematea, eta herritarren arteko harremanak sendotzea baizik”.
Artisau gozogintza izango da azokaren ardatza, baina harago doala azaldu dute, “tokiko ekoizpena, ofizioa, merkataritza eta ostalaritza lotuko dituen esperientzia izango da, eta herritarrak, guztiaren protagonista”. Azokaren bihotzean lantegi bat jarriko dute eta artisau gozogileek lan egiteko modua zuzenean erakutsiko dute; txokolatezko pieza berezi bat sortzea ere aurreikusi dute. Azokak gainera, Oarsoaldearen kontakizuna mahai gaineratuko duela adierazi dute antolatzaileek. hala, Kakaoak Ameriketatik Pasaiara egindako bidea abiapuntua izango da; Errenteria-Oreretak industria eta merkataritza ekarpena irudikatuko du; eta Oiartzunek, lehen sektorearen eta bertako lehengaien garrantzia gogoraraziko du, “lau herrien loturak agerian utziko dituen ibilbide sinbolikoa izango da, tokiko ekonomia, ofizioak eta komunitatea elkarrekin eraikitzen direla erakusteko”.
Askotariko ekoizle eta artisau
Askotariko ekoizle eta artisau bilduko dira azokara, Lezokoak zein Oarsoaldeko beste herrietakoak ere. Hala, merkataritza gunean ondokoak izango dira: Aparola SC (Errenteria-Orereta), behi-, ardi- eta ahuntz-gaztekin; OnEin Kontserbak (Lezo), sagar-marmelada eta gozokiekin; Kuskurro Okintza (Lezo); Zituene Koop. (Errenteria-Orereta); eta Versum Garagardoak (Irun). Horiek momentuz batu direnak.
Gozogintza gunean, Gozoa elkarteko kideak izango dira: Dulces Free (Donostia), Maitiana bonboi-denda (Donostia), Geltoki Gozotegia (Donostia), Oiartzun Gozotegia (Donostia), BakerBoyz artisau-gozotegia (Errenteria-Orereta), Leonidas Belgikako txokolatea eta bonboiak (Lezo) eta Maizzami–artisau-tiramisua (Lezo) izango dira.
Adin guztietako publikoarentzat prestatutako egitaraua eskainiko du azokak, hala nabarmendu dute antolatzaileek. Lezora bertaratzen direnek artisau gozogintzaren sekretuak eta kalitatezko produktuen balioa gertutik ezagutzeko aukera izango dute. Haurrentzat ere izango da tokia; tailer sortzaileek gozogintza, irudimena eta jolasa uztartuko dituzte, familia osoak elkarrekin gozatzeko aukera izan dezan. Horrez gain, egun osoan zehar lantegia zuzenean ikusteko aukera izango da. Euskadiko artisau-gozogileek beren lan egiteko modua erakutsiko dute, produktuen atzean dagoen ezagutza, pazientzia eta ofizioa herritarrekin partekatuz.
