Ziriku: "Euskalgintzak erradikaltasuna izan behar du"
Ostiral arratsaldean egin zuten Ziriku euskara taldearen aurkezpen irekia. Ekinbide zehatzak iragarri dituzte.
Zirikuren ostiraleko batzarrararen une bat.Ziriku Lezoko zenbait herritarrek Ziriku euskara taldea sortu dute. Euskararen erabileraren beherakadak eragindako kezkak hainbat norbanako lezoar batu eta egoera horri “buelta ematen hasteko garaia” dela iritzita hasi dira euren egitekoarekin: “Ekinbide zehatzak egingo ditugu. Uste dugu euskalgintzak erradikaltasuna izan behar duela, herritarren kontzientzia piztu eta euskararen aldeko borroka indartzeko asmoz”.
Ostiral arratsaldean egin zuten Zirikukoek aurkezpen batzarra Kultura Aretoan. Han hitz egindakoen artean, taldearen beraren ardatzak azaldu zituzten: “Euskararen aldeko kontzientzia indartzeko, erabilera handitzeko, eta hizkuntza eskubideak defenditzeko sortu da Ziriku”. Datuak jaso eta zabaldu dituzte euren kezka nondik datorren azaltzeko: lezoarren %70 euskaldun da; baina 2023an Soziolinguistikoa Klusterrak egindako kale neurketaren arabera, erabilera %29koa da. Are gehiago: 1990an kale neurketa horiek egiten hasi zirenetik jasota dagoen erabilera datu onenetik (2012koa) 12 puntuko jaitsiera izan da erabileran azken urteetan. Datu horiek eta beste asko herriko paretetan jarritako karteletan ikus daitezke.
Merkatariei, ostalariei, eta kultur, kirol edo aisia arloetako eragileei euskaraz bizitzeko eskatu die euskara taldeak, “behar izanez gero, badituzte laguntzak eta tresnak, tartean udalaren laguntzak. Zirikuk jarraipena egingo die”. Herritarrei ere interpelazio zuzena egin diete euskara erabil dezaten, batik bat, euskara jakin eta erabiltzen ez dutenei, “egin kontu, Lezon %29koa da erabilera”.
Talde motorra du Zirikuk, eta euren ardatzekin eta egiteko erarekin bat egin nahi dutenentzat ateak zabalik dituztela adierazi dute taldekideek. Zehaztu dute datozen asteetan herritarren sarea osatzeari ekingo diotela, haien laguntza eta proposamenak jasotzeko.
Taldearekin harremana egiteko sare sozialak edo posta elektronikoa erabil daitezkeela zehaztu dute.
