Lezo Euskaragarrirekin, ahalduntze gehiago
Bilboko GUKAren esperientzia eta EHEren eskutik bi eguneko tailerra izango dira Ahalduntze Eskolaren barruan.
Lezo Euskaragrri egitasmoaren barruko Ahalduntze Eskolak segida izango du urrian eta azaroan, “euskaraz bizitzeko eta euskaraz aritzeko herritarren ahalduntzea sustatzeko” bi proposamen landu ditu udalak. Hilaren 7an hitzaldi bat izango da, eta azaroaren 3 eta 10erako bi eguneko tailerra ondu du: “Ahalduntze Eskolaren helburua da herritarrei euskaraz aritzeko baliabideak eta konfiantza eskaintzea, egunerokoan hizkuntzaren erabilera sustatuz eta euskarazko harremanetan erosoago aritzeko aukerak sortuz”, zehaztu du udalak.
Euskararen gaineko ahalduntzea norbanakoetatik hasi eta kolektiboan eragiteko tresna bezala ulertzen du udalak, horregatik eskolaren barruko saioek ahalik eta parte hartze handiena izan dezatela desio du udal erakundeak, “Lezoko euskal hiztun komunitatea sendotzeko baliagarriak izango dira”.
Hilaren 7ko hitzaldian GUKA Bilboko euskaltzaleen plaza askearen gaineko esperientziaren berri emango du bertako kide Maialen Gagok. 19:30ean izango da, Kultura Aretoan eta doan.
Azaroaren 3 eta 10erako bi eguneko tailerra prestatu dute, Euskal Herrian Euskaraz (EHE) mugimenduko kide Intza Gurrutxagaren gidaritzapekoa, “euskaraz gehiago, gehiagorekin eta gehiagotan eroso aritzen ikasteko tailerra izango da”. Bi egun horietako 18:30ean hasiko da tailerra; parte hartzea doan da, baina aurrez izena eman behar da plaza gordetzeko. Baliatu esteka hau izen-ematerako.
