Euskaraz idatzi eta sortu nahi duten gaztetxoek hamahiru urteko konplize bat dute, OrriBakaR
Lezoko liburutegiaren literatura lehiaketan parte hartzeko epea azaroaren 20ra arte da zabalik. Sariak abenduaren 11n emango dituzte.
Iazko XII. ekitaldiko saridunen talde argazkia.Lander Zurutuza OrriBakaR Literatura Lehiaketak hamahirugarren ekitaldia izango du aurtengoa. Lezoko haur eta gazteek badute konplize bat euren idatzizko sormenak euskaraz garatu eta plazaratzeko. Gainera, saria irabazteko aukera ere badute. Bada, aurtengo OrriBakaR-en parte hartzeko epea zabalik da, azaroaren 20ra arte. Lehiaketaren izenarekin fidel bidali behar dituzte sormen lanak egileek, orrialde bakarrekoak behar dute izan eta euskaraz: bertsogintzako, olerkigintzako, ipuingintzako, kazetaritzako edo komikigintzako testu edo lanak izango dira onartuak, gai librekoak betiere. Andreone Lezoko Udalaren Liburutegiak antolatu du beste behin sariketa.
Lehiaketa 5 urtetik 15 urtera begirako Lezoko biztanleek edo Andreoneko bazkideek parte har dezakete OrriBakaR-en. Adinaren araberako bost maila ezarri dira::
- A maila, 6 eta 7 urtekoak.
- B maila: 8 eta 9 urtekoak.
- D maila 10 eta 11 urtekoak.
- E maila: 12 eta 13 urtekoak.
- F maila: 14 eta 15 urtekoak.
Antolatzaileek izendatutako epaimahai batek erabakiko ditu irabazleak, maila bakoitzeko bi hain zuzen ere. Hala, hamar saridun horiek liburuak erosteko bale bana jasoko dute. Epaileen erabakia apelaezina izango da, eta gerta daiteke sarietakoren bat eman gabe uztea, aurkeztutako lanek behar adinako maila ez izateagatik. Epaiaren berri Lezoko liburutegiaren webgunean emango da, eta sari-emateko ekitaldia abenduaren 11ko 19:00etan izango da Andreonen bertan.
