Puntako bertsolaritzaren epizentro, hogeita hamabosgarrenez
Andoni Egaña, Alaia Martin, Amets Arzallus, Maialen Lujanbio, Unai Iturriaga eta Jon Maia bertsolariak izango dira Niessen kulturguneko oholtza gainean, hilaren 17an.
Erein elkarteak antolatuta Bertso Festa izango da Niessen Kulturgunean hilaren 17an. Honakoa 35. aldia izango du Bertso Festak eta urtero moduan, aurten ere bertsolaritzaren epizentro bihurtuko du Errenteria-Orereta, punta-puntako bertsolarien parte hartzearekin.
Andoni Egaña, Alaia Martin, Amets Arzallus, Maialen Lujanbio, Unai Iturriaga eta Jon Maia bertsolari seikoak errima bihurrien ekitaldi paregabea eskainiko dute, zalantzarik ez da, eta zorrotz erantzungo diete Amaia Agirrek jarritako gaiei.
Bertsolaritzari dantza ere gehitu diote hogeita hamabosgarrenean, eta bertso dantza saio horretan Alain Maya, La Pulga, eta Hilario Rodeiro ariko dira.
Sarrerak salgai dira jada, 12 euroan, Landare eta Arkaitza tabernetan, eta Xenpelar Kultur dendan. Online ere eskura daitezke (klik hemen).
1992an lehen ekitaldia
Landare elkarteko kultur lantaldeak zabaldu zion bidea Bertso Festari 1992an; lantalde horretan ari ziren Juantxo Maya, Kontxi Sein, Mikel Olaskoaga eta Paco Sanzi bertsolaritza ardatz zuen ekitaldia antolatzeko harra piztu zitzaien. Pentsatu eta egin. Bertso Festa ekitaldirako, punta-puntako bertsolariak nahi zituzten, bai eta lortu ere. 1992ko maiatzaren 16an heldu zen lehena, eta Inaxio Usarraldek gidatuta Igor Elortza, Sebastian Lizaso, Jon Lopategi, Mikel Mendizabal, Jon Maia eta Anjel Mari Peñagarikano aritu ziren.
Hura lehena, eta hortik aurrera urtero hitzordua goi-goiko bertsolariekin.
Agertokia ere aldatu da, eta frontoi zaharretik, Niessen kulturgunera pasa zen jaia.
Bertso Festa bertsolaritza eta dantza uztartuko dituen emanaldiarekin hasiko da; Alain Maya eta La Pulga dantzariak, Hilario Rodeiro musikaria lagun dutela, Alaia Martin eta Andoni Egañarekin batera ariko dira. Ostean bertsolari seikoarena izango da oholtza.
