Euskararen erabileraren kezkak Ziriku sorrarazi du
Euskararen erabileraren beherakadak eragindako ezinegonak hainbat norbanako lezoar batu, eta egoera horri «buelta ematen hasteko garaia» dela iritzita euskara taldea eratu dute.
Zirikuren irailaren 25eko aurkezpen batzarreko irudia.Ziriku Lezoko zenbait herritarrek Ziriku euskara taldea sortu dute. Euskararen erabileraren beherakadak eragindako kezkak hainbat norbanako lezoar batu eta egoera horri «buelta ematen hasteko garaia» dela iritzita hasi dira euren egitekoarekin: «Ekinbide zehatzak egingo ditugu. Uste dugu euskalgintzak erradikaltasuna izan behar duela, herritarren kontzientzia piztu eta euskararen aldeko borroka indartzeko asmoz». Ostiral arratsaldean egin zuten Zirikukoek aurkezpen batzarra.
Han hitz egindakoen artean, taldearen beraren ardatzak azaldu zituzten: «Euskararen aldeko kontzientzia indartzeko, erabilera handitzeko, eta hizkuntza eskubideak defenditzeko sortu da Ziriku». Datuak jaso eta zabaldu dituzte euren kezka nondik datorren azaltzeko: lezoarren %70a euskalduna da; baina 2023an Soziolinguistika Klusterrak egindako kale neurketaren arabera, erabilera %29koa da. Are gehiago: 1990an kale neurketa horiek egiten hasi zirenetik jasota dagoen erabilera datu onenetik (2012koa) 12 puntuko jaitsiera izan da erabileran azken urteetan.
Merkatariei, ostalariei, eta kultur, kirol edo aisia arloetako eragileei euskaraz bizitzeko eskatu die sortu berri den euskara taldeak, «behar izanez gero badituzte tresnak, tartean udalaren laguntzak. Zirikuk jarraipena egingo die». Herritarrei ere interpelazio zuzena egin diete euskara erabil dezaten, batik bat, euskara jakin eta erabiltzen ez dutenei.
Talde motorra du Zirikuk, eta euren ardatzekin eta egiteko erarekin bat egin nahi dutenentzat ateak zabalik dituztela adierazi dute taldekideek. Zehaztu dute datozen asteetan herritarren sarea osatzeari ekingo diotela, haien laguntza eta proposamenak jasotzeko.
