Zabala Enea II gaztetxearena izango da urria
Hogeita seigarren urteurrena ospatzeko egitarau zabala ondu du Oreretako Gazte Asnbladak, Ibon Zabala gogoan; egun handia hilaren 24an ospatuko dute, egun osoko egitarauarekin.
Iazko urteurren bazkariko irudi bat. Ez diote lanari beldurrik. Argi utzi du berriro Oreretako Gazte Asanbladak hori. Izan ere, Zabala Enea II gaztetxearen urteurrena ospatzeko eta autogestionatutako espazioen beharra aldarrikatzeko egitarau zabala antolatu du hilabete osoan barrena. Hogeita sei urte bete ditu jada Gaztaño auzoko garai bateko parbularioa gazteen topaleku eta saretze espazio bilakatu zutenetik; hainbat belaunaldi hartu ditu ordutik adreilu laranjadun eraikinak. Hogeita sei urte horietan Gaztañoko haur eskola zaharrera heldu ziren lehenengo eguneko, zein aurreko hamarkadetako ilusioa eta borrokarako grina mantendu dute bertatik pasa diren gazteek.
Aurten aurreko urteetako osagai berekin kozinatu dute urteurren ospakizuna, beti ere, Ibon Zabala Lizarazu gogoan. Ez zuten ezagutu egungo asanbladako kideek, baino leial hartu dute aurreko belaunaldietatik datorren lekukoa Zabala omentzeko. Euskaltzalea, bertsolaria eta herriko gazte mugimenduetan erabat inplikatua zegoen Zabala; 1995eko uztailaren 1ean, Oreretako lehenengo Gazte Egunaren ospakizunen barruan ezbehar baten ondorioz zendu zen gaztea. 20 urte zituen. 31 urte geroago bizirik da ere gaurko gazteen memorian.
Bertsolaritza eta dotorezia eskutik helduko dira antolatutako lehen ekitaldian: bertso afari elegantea. Hilaren 10ean izango da hori Gaztañoko erabilera anitzeko espazioan. Arratsaldea karropoteoarekin girotu ostean —19:00etan Gaztetxetik abiatuta— helduko da bertso afaria (21:30) Egiar Otegi, Haizea Arana eta Julen Olaizola bertsolariekin; gai jartzaile lanetan Jare Antzizar bertsolari oreretarra.
Afarirako txartelak Arkaitzan dira salgai 12 euroan ikasleentzat eta 15 euroan langileentzat.
Ibon Zabala Lizarazuri omenaldia
Ibon Zabalari eskainitako eguna helduko da ondoren; hilaren 18an izango da hori, igandearekin, Urdaburu mendian. Bi modu jarri dituzte aukeran haraino iristeko: oinez edota kotxean. Oinez igotzen direnak 08:30ean elkartuko dira gaztetxean; autoa aukeratzen dutenak, leku berean elkartuko dira 10:00etan. Susperregi jatetxe parean egin dute hitzordua 10:30ean guztiak elkarrekin Urdaburura igotzeko. Omenaldiaren ondoren hamaiketakoa egingo dute bertan.
Egun handia hilaren 24koa izango da; horretarako egun osoko egitaraua ondu du gazte asanbladak, eta askotarikoa. Goizean bitxigintza tailerra, marianito dastaketa, eta toka txapelketa antolatu ditu. Horren ondotik, indarrak hartzeko, makarroi jatea eta pikoteoa antolatu dituzte; oturantzarako prezioa zehazteke du oraindik asanbladak.
Bazkal ostean, berriz, bingoa; eta hortik aurrera musika. Gauerdi txarangak jarriko du giroa 18:00etatik aurrera eta 20:00etan Malenek eta Uxuek emanaldi akustikoa egingo dute. Gau partean, Suteka eta Xaukena Xauk taldeak ariko dira, eta horiekin batera hirugarren talde bat, aurrerago jakinaraziko dutena.
Parte hartzeko deia
Oreretako Gazte Asanbladak antolatutako jarduerekin bat egitera deitu ditu gazte guztiak, baita Zabala Enea II gaztetxean parte hartzera asanbladarekin bat eginda. Asteazkenero elkartzen dira 18:00etan, eta interesa izan dezakeen gazte ororentzat ateak zabalik dituela gogorarazi du.
Gaztetxea behar-beharrezkoa den zalantzarik ez dute asanbladako kideek, gazteentzat ezinbesteko espazioa dela adierazi dute: «Gaztetxea herriko gazteentzako espazio seguru eta euskalduna da, eta ez hori bakarrik. Izan ditzakegun arazo eta kezkak elkarbanatu eta lantzeko ere baliatzen dugu. Hausnarketarako espazioa da beste gauza askoren artean, baita eztabaidarako gunea ere». Gonbita berriro, herriko gazteei, «lanera datorren oro, ongietorria izango da».
