Luis Goyari aitortza egingo dio Lezoko Zinema Ttikiak
Zinemagile lezoarraren figura nahiz obra omendu eta ezagutaraziko dituzte hura hil eta 20 urtera. Proiekzioak eta solasaldiak egingo dira.
Luis Goia. Lezoko Zinema Ttikiak aitortza egingo dio Luis Goya zinemagile lezoarrari eta haren ondareari. Hura hil zela 20 urte bete ziren irailaren 26an, eta testuinguru horretan sortzaile eta kultur ekintzaile lezoarrari aitortza egiteko hautua egin du herriko eragileak. Are gehiago: “Egitasmoa Luis Goyaren lana berreskuratu eta ezagutarazteaz harago doa: Lezok euskal zinemaren historian izan duen, eta duen lekua aldarrikatu nahi da; eta zinema belaunaldi berriei gerturatzea ere bada asmoa”. Hilaren 13, 14, 15 eta 19rako proiekzioak eta solasaldia antolatu dituzte.
Zinema Ttikiak Urtzi Urkizuren, Lezoko Udalaren eta Euskal Filmotekaren laguntzarekin Luis Goyaren figura eta lana ardatz dituzten jarduerak izango dira datorren astekoak. “Euskal zinemaren erreferente izateaz gain”, adierazi dute Zinema Ttikiko kideek, “Goya lezoarra zen, eta bere jaioterrian haren ondarea ezagutarazi eta belaunaldi berriei gerturatu nahi zaie iniziatiba honen bitartez”.
Lehen jarduera hilaren 13an izango da. Gezala Auditoriumean, 19:00etan, Ke arteko egunak filma proiektatuko da. Antxon Ezeizak zuzendutako lanaren ekoizle izan zen Goya.
Hilaren 14an, berriz, Gezalak Euskaldunon Goya dokumentalaren pasea jasoko du (19:00), Urtzi Urkizuk eta Lara Madinabeitiak egina; horren ondoren Urkizuk berak solasaldia eskainiko du HITZAko kazetari Urko Etxebesteren laguntzarekin. Gainera, Luis Goyaren lagun izandako Antton Leundak duela 20 urte prestatu eta inoiz argitaratu ez diren bertsoak eskainiko ditu. “Horrela, Goyaren alderdi artistikoaz gain, pertsona eta lezoar gisa izan zuen ibilbidea eta ingurukoekin izandako harremana ere gogoratuko dira”.
Belaunaldi berrietan Goya nor zen ezagutaraztea da jardunaldien xedeetako bat. Hala, gaztetxoei begirako beste bi emanaldi prestatu dituzte Lezoko Zinema Ttikikoek: Kalabaza tripontzia animazio filma ikusteko aukera izango dute Lezo Herri Eskolako eta Pasaia-Lezo Lizeoko ikasleek. “Kalabaza tripontzia euskal animaziozko zinemaren aitzindaria izan zen, eta filmaren sorreran hainbat lezoarrek parte hartu zuten. Horregatik, proiekzioa aukera berezia izango da Lezoko gazteek herriko hainbat herritarrek euskal zinemaren historian egindako ekarpena ezagutzeko”, zehaztu dute. Filmaren ondoren ordutik hona animaziozko filmek izan duten bilakaera aztertuko dute ikasleek, euskal animazioaren ibilbidea eta gaur egungo egoera ezagutzeko.
