Txokolate arima izango du Lezok larunbatean
Auzoaren Arima Gozoa azoka jasoko du Lezok larunbatean (hilaren 17an). Txokolatea ardatz, jarduera eta proposamen asko izango dira goizetik arratsaldera.
Larunbatean txokolatearen eta txokolatearen zaleen erreinu izango da Lezo Auzoaren Arima Gozoa azokari esker. Azokek ohikoak dituzten postuak izango dira, baina egunaren ezaugarri nagusienetako bat da herritarrek jarduera askotan parte hartzeko aukera izango dutela, betiere horien mamia txokolatea izango delarik. Egitasmoaren antolatzaile Gozoa Euskadiko gozogileen elkartea, Lezoko Udala eta Auzoaren Arima iniziatiba —Oarsoaldea Garapen agentziaren bidez— dira. 10:30etik 19:00etara izango da zabalik azoka. Salva enpresa ere egunaren babesleen artean da.
Beraz, Lezoko kaleak tokiko merkataritzaren, artisau gozogintzaren eta auzo bizitzaren topagune bihurtuko ditu azokak. Gainera, Lezoko Udalaren Elkar Zainduz leloaren balioak kalera eramango dituela azaldu dute antolatzaileek: “Tokikoa zaindu, elkar zaindu eta herri bizi bat eraikitzen jarraitu”.
Lezoko erdigunea hainbat gunetan banatuko dute: tokiko merkatuaren gunea, artisau gozogintzaren gunea eta herritarrak elkartu eta produktuen inguruan esperientziak partekatzeko topagunea: “Helburua ez da produktu bat saltzea, kaleak elkargune bihurtzea, bertako merkataritzari balioa ematea, eta herritarren arteko harremanak sendotzea baizik”.
Artisau gozogintza izango da azokaren ardatza, baina harago doala azaldu dute, “tokiko ekoizpena, ofizioa, merkataritza eta ostalaritza lotuko dituen esperientzia izango da, eta herritarrak, guztiaren protagonista”. Azokaren bihotzean lantegi bat jarriko dute eta artisau gozogileek lan egiteko modua zuzenean erakutsiko dute; txokolatezko pieza berezi bat sortzea ere aurreikusi dute. Azokak, gainera, Oarsoaldearen kontakizuna mahai gaineratuko duela adierazi dute antolatzaileek. Hala, kakaoak Ameriketatik Pasaiara egindako bidea abiapuntua izango da; Errenteria-Oreretak industria eta merkataritza ekarpena irudikatuko du; eta Oiartzunek, lehen sektorearen eta bertako lehengaien garrantzia gogoraraziko du, “lau herrien loturak agerian utziko dituen ibilbide sinbolikoa izango da, tokiko ekonomia, ofizioak eta komunitatea elkarrekin eraikitzen direla erakusteko”.
Adin guztietako publikoarentzat prestatutako egitaraua eskainiko du azokak (behean ikus daiteke), hala nabarmendu dute antolatzaileek. Lezora bertaratzen direnek artisau gozogintzaren sekretuak eta kalitatezko produktuen balioa gertutik ezagutzeko aukera izango dute. Haurrentzat ere izango da tokia; tailer sortzaileek gozogintza, irudimena eta jolasa uztartuko dituzte, familia osoak elkarrekin gozatzeko aukera izan dezan. Horrez gain, egun osoan zehar lantegia zuzenean ikusteko aukera izango da. Euskadiko artisau-gozogileek beren lan egiteko modua erakutsiko dute, produktuen atzean dagoen ezagutza, pazientzia eta ofizioa herritarrekin partekatuz.
Beraz, honakoa da eguneko tailerren eta jardueren egitaraua (behean, azokan izango direnen zerrendan ikus daiteke):
- 10:30. Inaugurazio ekitaldia.
- 11:00. Karpa nagusian, Txokolategilea familientzako tailerra Maitiana bonboi denaren eskutik.
- 11:30. Zitueneko karpan, Pasta eta txokolatearen maisu txikiak haurrentzako tailerra Zitueneren eskutik.
- 11:30. OnEin Kontserbak karpan, Mermelada eta txokolatearen tailer esperimentala haurrentzako tailerra OnEin Kontserbak-en eskutik.
- 12:00. Goiko Plazan, Antxoko Anakrusa taldearen Garden dantza eta antzerki ikuskizuna, Antzerki Ametsetan jardunaldien barrukoa.
- 12:15ean eta 12:35an. Karpa nagusian, Sortu zure tiramisu txikia tailerra haurrentzat Maizzamiren eskutik.
- 16:00. Karpa nagusian, Txokolategilea tailerra haurrentzat Maitiana bonboi denaren eskutik.
- 16:30. OnEin Kontserbak karpan, Mermelada eta txokolatearen tailer esperimentala haurrentzako tailerra OnEin Kontserbak-en eskutik.
- 16:30. Zitueneren karpan, Txokolatearekin jateko pasta frijitua tailerra helduentzat, Zitueneren eskutik.
- 17:15. Karpa nagusian, Oloarekin egindako askari osasungarria familientzako tailerra Dulces Free-ren eskutik.
- 18:00. Gurutze Santuaren plazan, herri txokolate jatea, parte hartze jarduera, eta bukaera ekitaldia Auzoaren Arimaren txokolatezko skyline-a egiten.
Askotariko ekoizle eta artisauak
Askotariko ekoizle eta artisau bilduko dira azokara, Lezokoak zein Oarsoaldeko beste herrietakoak ere. Hala, merkataritza gunean ondokoak izango dira: Aparola (Errenteria-Orereta), behi-, ardi- eta ahuntz-gaztekin; OnEin Kontserbak (Hernani), sagar-marmelada eta gozokiekin; Kuskurro Okintza (Lezo); Zituene (Errenteria-Orereta); eta Versum garagardoak (Oiartzun).
Gozogintza gunean, Gozoa elkarteko kideak izango dira: Dulces Free (Donostia); Maitiana bonboi-denda (Donostia); Geltoki gozotegia (Donostia); Oiartzun Gozotegia (Donostia); BakerBoyz artisau-gozotegia (Donostia); Leonidas Belgikako txokolatea eta bonboiak (Donostia) eta Maizzami–artisau-tiramisua (Donostia); eta La Gesalina (Andoain) izango dira.
