Olentzero eta Mari Domingiren etorrera antolatzen hasi dira
Ekitaldia ahalik eta ondoen antolatzeko antolaketa taldea berritu eta indartu nahi du Lau Haizetara euskaltzaleon topaguneak.
Jendetza biltzen da ekitaldira urtero.Ximun Leturia Lete Aurten ere ilusioz egingo dute menditik kalerako bidea Olentzerok eta Mari Domingik. Hori horrela, haien etorrera antolatzen hasia da dagoeneko Lau Haizetara Euskaltzaleon Topagunea. Elkarte horrek antolatzen du urtero-urtero haurrentzako hain garrantzitsua eta maitatua den hitzordua. Ekitaldia ahalik eta egokien antolatzeko, elkartearen menpe ari den Olentzero eta Mari Domingi lantaldeak, bere burua berritu eta indartu nahi du, eta laguntza eskatu du horretarako.
Antolaketan parte hartzera deitu ditu interesa izan dezaketen herritarrak; denbora asko eskaintzea ez dela beharrezkoa azaldu du lantaldeak. Zehaztasunak ere eman ditu: bi bilera egingo dituzte ekitaldia prestatzeko. Gainera, jakinarazi du, abenduaren 23an bertan ere —egun horretan antolatzen du euskara elkarteak haurren Olentzero eta Mari Domingi— laguntzaileak beharko dituela zeregin jakinetan aritzeko, “norberak ahal duen neurrian laguntzeko aukera dago: antolaketa lantaldean parte hartuz, ideiak proposatuz, edo egun horretan une jakin batean lagunduz”.
Desfilea ikusgarria egin eta ekitaldia haur zein familientzat ahalik eta erakargarriena izan dadin ideia eta proposamen berrian bereziki eskertuko ditu Lau Haizetarak.
Jarduera antolatzeko bilera irekia egingo dute hilaren 22an, ostegunarekin, 18:30ean Lau Haizetararen egoitzan— Joxepa Antoni Aranberri anitzenean, beheko solairuan—. Bilera irekia izango da.
Informazio gehiago jasotzeko edota parte hartzea baieztatzeko posta elektronikora mezua bidal daiteke (klik hemen) edo 613 25 49 04 telefono zenbakira deitu. “Herritarrak animatu nahi ditugu ekitaldiaren antolaketan parte hartzera, Olentzero eta Mari Domingiren etorrera guztion artean egiten jarraitzeko”, gaineratu dute.
