Aizpea Otaegi: "Erreleboa bermatuta dago"
Aizpea Otaegik gaur jakinarazi du ez dela 2027ko Udal Hauteskundeetan hautagai izango.
Aizpea Otaegi artxiboko irudi batean Hirugarrena ez du egingo. Gaur jakinarazi du Aizpea Otaegi Mitxelena Errenteria-Oreretako alkateak 2027ko Udal Hauteskundeetan hautagai ez dela izango, eta beraz, zortzi urte eta bi agintaldiko ibilbidea bukatuko duela alkate gisa datorren urteko ekainean.
2019an heldu zen alkatetzara Otaegi; historikoa izan zen bere kargu hartzea, izan ere Errenteria-Oreretako lehen emakumezko alkate izan da eta udalbatza berria eratzeko saioan harro egin zion erreferentzia mugarri horri Otaegik: “Ni hemen egotea emakumeon, mugimendu feministaren, eta gizarte osoaren lorpena eta garaipena da”.
Hauteskundeak erraz irabazi zituen Otaegi buru zuen EH Bilduren zerrendak, 2015ean izandakoak baino 1.000 boto gehiago lortuta. 2023ko Udal Hauteskundeetan berriro izan zen alkategai, eta berriz ere errepikatu zuen garaipena.
Zortzi urte hauetan agerian jarri du behin eta berriz kontsentsua eta adostasunaren aldeko jarrera, baita duen alde humanoa ere.
Bideo baten bidez jakinarazi du sare sozialetan. Berria ilusioz eman duela dio, “zorionez, gurea proiektu partekatua da, esku askoren artean eraikia eta bi agintaldiko zikloa beteko den honetan, iritsi da erreleboa emateko unea, eta bermatuta dago errelebo hori”. EH Bilduren proiektuaren segida seguru dagoela gaineratu du.
Alkatetza “pasioz ” bizi duela eta bere onena ematen saiatu dela bi agintaldietan esan du, “gure herriaren alde”, bestalde alkateak, eta agintaldia bukatzeko gelditzen diren hilabeteetan konpromiso berarekin jarraituko duela lanean hitz eman du.
